អាជ្ញាធរបាននិយាយកាលពីថ្ងៃពុធថា ក្រុមសកម្មប្រយុទ្ធប្រដាប់អាវុធ បានពួនស្ទាក់វាយប្រហារលើកងកម្លាំងសន្តិសុខនីហ្សេរីយ៉ា ដែលកំពុងឆ្លើយតបទៅនឹងការហៅទូរស័ព្ទសុំជំនួយ នៅភាគពាយ័ព្យនៃរដ្ឋ Kebbi ដោយបាញ់សម្លាប់ទាហានចំនួន ៩នាក់ មន្ត្រីនគរបាលម្នាក់ និងអ្នកស្រុកម្នាក់។ 

ក្រុមសកម្មប្រយុទ្ធ បានកំណត់គោលដៅលើកងកម្លាំងសន្តិសុខ នៅក្នុងតំបន់ក្រុមប្រឹក្សា Shanga នៃទីក្រុង Kebbi កាលពីយប់ថ្ងៃអង្គារ នៅពេលដែលពួកគេកំពុងត្រូវបានដាក់ពង្រាយ ដើម្បីឆ្លើយតបទៅនឹងការព្រមានអំពីការវាយប្រហារដែលអាចកើតឡើង។ នេះបើយោងតាមលោក Yahaya Sarki អ្នកនាំពាក្យរដ្ឋាភិបាលរដ្ឋ Kebbi។  

លោក Sarki ដែលបានចែករំលែករូបថតរថយន្តដែលឆេះតាមបណ្តោយផ្លូវដែលមានធូលីព័ទ្ធជុំវិញដោយព្រៃឈើ បាននិយាយថា ទាហានជាច្រើននាក់ ក៏បានរងរបួស នៅក្នុងការវាយប្រហារនៅក្នុងភូមិ Giron Masa។

អភិបាលរដ្ឋ Kebbi លោក Nasir Idris បានទៅសួរសុខទុក្ខទាហានដែលរងរបួសនៅមន្ទីរពេទ្យ ហើយបាននិយាយថា ការវាយប្រហារនេះ បានបង្កឲ្យមានការខាតបង់យ៉ាងធំធេង។ លោកបានបញ្ជាក់ថា៖«អ្នកដែលបាត់បង់ជីវិត រដ្ឋាភិបាលរដ្ឋនេះ នឹងធ្វើអ្វីគ្រប់យ៉ាង ដើម្បីជួយដល់ក្រុមគ្រួសាររបស់ពួកគេ»។

ការវាយប្រហារនេះ គឺជាការវាយប្រហារចុងក្រោយបង្អស់ នៅក្នុងវដ្តនៃអំពើហិង្សា នៅក្នុងតំបន់ដែលមានជម្លោះ នៅក្នុងប្រទេសនីហ្សេរីយ៉ា ជាកន្លែងដែលក្រុមប្រដាប់អាវុធតែងតែកំណត់គោលដៅលើកងកម្លាំងសន្តិសុខ និងសហគមន៍ដាច់ស្រយាលនៅក្នុងតំបន់ ដែលមានវត្តមានរបស់រដ្ឋ និងសន្តិសុខមានកម្រិត៕