ក្រុមបាល់ទាត់បុរសរបស់ជម្រើសជាតិអ៊ីរ៉ង់ បានប្រមូលផ្តុំហ្វឹកហាត់នៅភាគខាងត្បូងប្រទេសទួកគី ត្រៀមការប្រកួតមិត្តភាព ស្របពេលដែលលទ្ធភាពបង្ហាញខ្លួននៅ World Cup នៅមិនទាន់ច្បាស់លាស់នៅឡើយដោយសារសង្រ្គាមរវាងសហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់។

រដ្ឋមន្ត្រីកីឡារបស់ប្រទេសអ៊ីរ៉ង់បាននិយាយថា វាមិនអាចទៅរួចទេសម្រាប់កីឡាករក្នុងការចូលរួមក្នុងការប្រកួតនេះ បន្ទាប់ពីសហរដ្ឋអាមេរិកបានបើកការវាយប្រហារតាមអាកាសជាមួយអ៊ីស្រាអែលប្រឆាំងនឹងទីក្រុងតេអេរ៉ង់ ដោយបានសម្លាប់មេដឹកនាំកំពូលរបស់សាធារណរដ្ឋអ៊ីស្លាម។

យ៉ាងណាក្តី សហព័ន្ធបាល់ទាត់ទ្វីបអាស៊ី AFC មិនទាន់ទទួលបានការបញ្ជាក់ផ្លូវការនៅឡើយពីអ៊ីរ៉ង់ ជុំវិញការដកខ្លួនរបស់ក្រុមជម្រើសជាតិនៅព្រឹត្តិការណ៍បាល់ទាត់ពិភពលោកឆ្នាំនេះ តែកន្លងមកប្រធានសហព័ន្ធបាល់ទាត់អ៊ីរ៉ង់បានលើកឡើងថា នឹងជួបពិភាក្សាជាមួយ FIFA ជុំវិញលទ្ធភាពលើកការប្រកួតរបស់អ៊ីរ៉ង់ទាំងអស់ទៅម៉ិកស៊ិក ពីកាលវិភាគចាស់ដែលប្រកួតនៅអាមេរិក។

អ៊ីរ៉ង់នឹងត្រូវមានការប្រកួតមិត្តភាពចំនួនពីរនៅលើទឹកដីទួកគីនេះ ទល់នឹងនីហ្សេរីយ៉ា និងកូស្តារីកា ដែលចាត់ទុកជាការប្រកួតមិត្តភាពចុងក្រោយមុន World Cup សម្រាប់អ៊ីរ៉ង់។

តាមពិតទៅការប្រកួតមិត្តភាពទាំងពីរនេះ គ្រោងរៀបចំនៅលើទឹកដីហ្សកដានី​ តែក៏បានផ្លាស់មកទួកគីវិញដោយសារសង្គ្រាមនៅមជ្ឈឹមបូព៌ា។

អ៊ីរ៉ង់ស្ថិតនៅក្នុងពូល G នៅ World Cup 2026 ដែលរៀបចំនៅអាមេរិក ម៉ិកស៊ិក និងកាណាដា ហើយនៅក្នុងពូលនោះរួមមាន នូវែលសេឡង់ ប៊ែលហ្ស៊ិក និងអេហ្ស៊ីប៕ អត្ថបទ៖ នាង សុភាវុធ