ការប្រយុទ្ធគ្នាជាថ្មីបានផ្ទុះឡើងនៅតាមបណ្ដោយព្រំដែនរវាងអាហ្វហ្គានីស្ថាន និងប៉ាគីស្ថាន កាលពីថ្ងៃពុធ (២៥ មីនា) បន្ទាប់ពីបទឈប់បាញ់បណ្ដោះអាសន្នបានផុតកំណត់ ដោយបានសម្លាប់ជនស៊ីវិលមួយចំនួន និងបណ្ដាលឱ្យមានអ្នករងរបួសផ្សេងទៀតនៅភាគខាងកើតអាហ្វហ្គានីស្ថាន នេះបើតាមការបញ្ជាក់ពីក្រុមមន្ត្រីតាលីបង់អាហ្វហ្គានីស្ថាន។

បទឈប់បាញ់រយៈពេលខ្លីនេះ ត្រូវបានប្រកាសដោយភាគីទាំងពីរនៅមុនថ្ងៃបុណ្យសាសនាអ៊ិស្លាម Eid al-Fitr។ លោក Ziaur Rahman Speenghar មន្រ្តីជាន់ខ្ពស់នៅអាហ្វហ្គានីស្ថាន បាននិយាយថា កងកម្លាំងប៉ាគីស្ថាន បានបាញ់គ្រាប់កាំភ្លើងធំរាប់សិបគ្រាប់ចូលទៅក្នុងស្រុក Narai និង Sarkano ដែលបានសម្លាប់ជន និងនាំឱ្យមានអ្នករបួសមួយចំនួន បន្ទាប់ពីបទឈប់បាញ់បានផុតកំណត់។

លោកបានបន្តថា កងកម្លាំងព្រំដែនអាហ្វហ្គានីស្ថានបានបាញ់តបតវិញ ដោយអះអាងថាពួកគេបានកម្ទេចប៉ុស្តិ៍យោធាប៉ាគីស្ថានចំនួន ៣កន្លែង និងសម្លាប់មនុស្សម្នាក់។ ទោះជាយ៉ាងណា ការអះអាងនេះមិនទាន់ត្រូវបានបញ្ជាក់ដោយប្រភពឯករាជ្យនៅឡើយទេ ហើយក៏មិនទាន់មានការឆ្លើយតបភ្លាមៗពីខាងយោធាប៉ាគីស្ថានដែរ។ មន្ត្រីមូលដ្ឋានប៉ាគីស្ថានមួយរូបនៅភាគពាយព្យ បានចោទប្រកាន់កងកម្លាំងអាហ្វហ្គានីស្ថានថា ជាអ្នកចាប់ផ្ដើមការបាញ់ប្រហារនៅក្នុងតំបន់ជាច្រើន។

អំពើហិង្សាចុងក្រោយនេះ បានកើតឡើងប្រហែលមួយសប្តាហ៍ប៉ុណ្ណោះ បន្ទាប់ពីភាគីទាំងពីរបានយល់ព្រមផ្អាកការវាយប្រហារ តាមការស្នើសុំពីអារ៉ាប៊ីសាអ៊ូឌីត ទួរគី និងកាតា។ ដោយឡែក ក្រុមសកម្មប្រយុទ្ធ តាលីបង់ប៉ាគីស្ថាន ដែលត្រូវបានគេស្គាល់ថាជាក្រុម Tehrik-e-Taliban Pakistan ឬ TTP ក៏បាននិយាយថា ខ្លួនបានចាប់ផ្ដើមការវាយប្រហារឡើងវិញនៅប៉ាគីស្ថាន បន្ទាប់ពីបានរក្សាបទឈប់បាញ់អស់ ៣ថ្ងៃក្នុងឱកាសបុណ្យ Eid របស់ខ្លួនរួចមក៕