ប្រធានទីភ្នាក់ងារជនភៀសខ្លួនរបស់អង្គការសហប្រជាជាតិ លោក Barham Salih កាលពីថ្ងៃពុធ (២៥ មីនា) បានទទូចឱ្យម្ចាស់ជំនួយផ្តល់ថវិកាបន្ថែម ដើម្បីដោះស្រាយផលប៉ះពាល់ផ្នែកមនុស្សធម៌ដែលកើតចេញពីសង្រ្គាមដែលកំពុងរីករាលដាលនៅតំបន់មជ្ឈិមបូព៌ា ដោយលោកបានលើកឡើងថា រហូតមកដល់ពេលនេះ ទីភ្នាក់ងារជនភៀសខ្លួនមួយនេះ ទទួលបានថវិកាតិចជាង ១០% ប៉ុណ្ណោះនៃចំនួនដែលត្រូវការចាំបាច់។

មនុស្សរាប់ពាន់នាក់ត្រូវបានសម្លាប់នៅទូទាំងតំបន់ ហើយមនុស្សរាប់លាននាក់បានបាត់បង់ទីជម្រកនៅអ៊ីរ៉ង់ និងលីបង់ ចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហារលើអ៊ីរ៉ង់ កាលពីថ្ងៃទី ២៨ ខែកុម្ភៈ ដែលនាំឱ្យទីក្រុងតេអេរ៉ង់ វាយបកវិញទៅលើអ៊ីស្រាអែល មូលដ្ឋានទ័ពអាមេរិក និងបណ្តារដ្ឋនៅតំបន់ឈូងសមុទ្រ។

នៅអ៊ីរ៉ង់ មនុស្សប្រហែល ៣,២លាននាក់ បានភៀសខ្លួនពីផ្ទះសម្បែង ខណៈមនុស្សជាង ១លាននាក់ ត្រូវបានបង្ខំឱ្យចាកចេញពីផ្ទះសម្បែងរបស់ពួកគេនៅលីបង់ ដែលជាតួលេខប្រហែល ១៧% នៃចំនួនប្រជាជនសរុប ក្នុងរយៈពេលប៉ុន្មានសប្តាហ៍ថ្មីៗនេះ ស្របពេលវិបត្តិមនុស្សធម៌កាន់តែធ្ងន់ធ្ងរឡើង។

លោក Salih ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន បានប្រាប់ទីភ្នាក់ងារព័ត៌មានរ៉យទ័រក្នុងបទសម្ភាសន៍មួយនៅទីក្រុងព្រុចសែលថា៖ «អង្គការបានអំពាវនាវសុំជំនួយចំនួន ៦៩លានដុល្លារ សម្រាប់មជ្ឈិមបូព៌ា ប៉ុន្តែរហូតមកដល់ពេលនេះ ទីភ្នាក់ងារជនភៀសខ្លួន ទើបតែទទួលបានតិចជាង ១០% ប៉ុណ្ណោះ។ នេះជាវិបត្តិដ៏ធំធេងបំផុត ហើយប្រជាជនពិតជាត្រូវការជំនួយខ្លាំងណាស់»៕