អ្នកដំណើររាប់ម៉ឺននាក់នៅតែជាប់នៅមួយកន្លែងអស់រយៈពេលជាច្រើនសប្តាហ៍ ក្នុងអំឡុងពេលមានជម្លោះអ៊ីរ៉ង់ ខណៈដែលការលុបចោលជើងហោះហើរយ៉ាងច្រើន នៅទូទាំងមជ្ឈមណ្ឌលឈូងសមុទ្រ ធ្វើឲ្យក្រុមហ៊ុនអាកាសចរណ៍មានក្ដីបារម្ភ និងអ្នកដំណើរពិបាករកផ្លូវត្រឡប់ទៅផ្ទះសម្បែងវិញ។

អ្នកថតរូបចូលនិវត្តន៍ លោក Bernard Kuhn និងភរិយា បានជាប់នៅប្រទេសស្រីលង្កា បន្ទាប់ពីក្រុមហ៊ុនអាកាសចរណ៍ Qatar Airways បានលុបចោលជើងហោះហើរទៅកាន់ទីក្រុងឡុងដ្រ៍របស់ពួកគេ។ បន្ទាប់ពីព្យាយាមមិនសម្រេចបានជាច្រើនថ្ងៃ ក្នុងការទាក់ទងក្រុមហ៊ុនអាកាសចរណ៍នេះ ដោយការហៅទូរស័ព្ទត្រូវបានផ្ដាច់ ហើយក៏គ្មានការផ្ដល់ព័ត៌មានអ្វីបន្ទាប់ពីនោះ ពួកគេបានសម្រេចចិត្តបោះបង់ចោល ហោះហើរទៅក្រុងបាងកក ហើយរង់ចាំ ១០ថ្ងៃមុនពេលទិញសំបុត្រថ្មី។ ការប្ដូរផ្លូវនេះ ត្រូវចំណាយ ៥.០០០ផោន (៦.៧០០ដុល្លារ) ដែលបង្ខំឲ្យអ្នកទាំង២ លុបចោលដំណើរកម្សាន្តវិស្សមកាលឆ្នាំ២០២៦។ បទពិសោធន៍របស់គ្រួសារ Kuhn ឆ្លុះបញ្ចាំងពីបញ្ហាកាន់តែទូលំទូលាយ ខណៈដែលជើងហោះហើរជាង ៥០.០០០ជើង ត្រូវបានលុបចោល ដែលរំខានដល់ផ្លូវឈប់សំចតដ៏មមាញឹកបំផុតមួយរបស់ពិភពលោក។ អ្នកធ្វើដំណើរជាច្រើននិយាយថា ក្រុមហ៊ុនអាកាសចរណ៍ បានបរាជ័យក្នុងការរៀបចំសំបុត្រយន្តហោះឡើងវិញភ្លាមៗ ឬមិនជួយអ្វីឡើយ ដោយទុកឲ្យអ្នកដំណើរស្វែងរកដំណោះស្រាយដោយខ្លួនឯងផ្ទាល់។

ការត្អូញត្អែររបស់ពួកគេនេះកើតឡើង ខណៈដែលក្រុមហ៊ុនអាកាសចរណ៍ឈូងសមុទ្រ ប្រឈមនឹងកម្រិតនៃការរំខានដ៏កម្រមួយ ដោយសារការបិទដែនអាកាសបង្កឲ្យមានការលុបចោលភ្លាមៗ នៅទូទាំងបណ្តាញផ្លូវចម្ងាយឆ្ងាយដ៏មមាញឹកបំផុតមួយរបស់ពិភពលោក។ ដោយប្រហែល ១ភាគ៣ នៃជើងហោះហើរអឺរ៉ុប-អាស៊ីត្រូវឆ្លងកាត់មជ្ឈមណ្ឌលឈូងសមុទ្រ ដូច្នេះ សូម្បីការបិទរយៈពេលខ្លី ក៏អាចធ្វើឲ្យច្របូកច្របល់ទូទាំងពិភពលោកបានដែរ។

ទន្ទឹមនឹងនេះដែរ ការធានារ៉ាប់រងការធ្វើដំណើរមិនត្រូវបានផ្ដល់សំណងច្រើនឡើយ ដោយសារគោលនយោបាយភាគច្រើនមិនរាប់បញ្ចូលការរំខានទាក់ទងនឹងសង្គ្រាមនោះទេ។ លោក Steven Berger មេធាវីម្នាក់មកពីអង្គការអ្នកប្រើប្រាស់អឺរ៉ុប បាននិយាយថា៖ «មិនមានអ្នកដំណើរសកលណាមួយត្រូវបានសងសំណង ក្នុងអំឡុងពេលមានវិបត្តិបែបនេះឡើយ»៕