ប្រធានសមាគមអឌ្ឍចន្ទក្រហមអ៊ីរ៉ង់ បានបង្ហាញពីទំហំដ៏គួរឲ្យភ្ញាក់ផ្អើលនៃការបំផ្លិចបំផ្លាញ លើហេដ្ឋារចនាសម្ព័ន្ធស៊ីវិល ចាប់តាំងពីសហរដ្ឋអាមេរិក និងអ៊ីស្រាអែល បានចាប់ផ្តើមយុទ្ធនាការយោធារបស់ពួកគេ លើអ៊ីរ៉ង់។ 

បើយោងតាមទីភ្នាក់ងារសារព័ត៌មាន Mehr បានឲ្យដឹងថា កាលពីថ្ងៃពុធ (ទី២៥ ខែមីនា ឆ្នាំ២០២៦) លោក Pirhossein Kolivand បានប្រកាសថា ទីតាំងស៊ីវិលមិនតិចជាង ៨៥.១៧៦កន្លែង ត្រូវបានធ្វើឲ្យខូចខាត ក្នុងនោះរួមមានទាំងប្លុកលំនៅឋានចំនួន ៦៤.៥៨៣កន្លែង និងអចលនទ្រព្យពាណិជ្ជកម្ម ១៩.៦៩០កន្លែង។

លោក Kolivand បានរៀបរាប់លម្អិតថា រដ្ឋធានីខេត្តរបស់ទីក្រុងតេអេរ៉ង់បានរងខូចខាតធ្ងន់ធ្ងរបំផុត។ ក្នុងចំណោមទីតាំងដែលរងផលប៉ះពាល់ មជ្ឈមណ្ឌលវេជ្ជសាស្ត្រ ២៨២កន្លែង និងសាលារៀន ៦០០កន្លែង ត្រូវបានកំណត់គោលដៅជាពិសេស។ មន្ត្រីអ៊ីរ៉ង់បានអះអាងថា សកម្មភាពបែបនេះ គឺជា «ឧក្រិដ្ឋកម្មសង្គ្រាម» ក្រោមអនុសញ្ញាទីក្រុងហ្សឺណែវ ដែលហាមឃាត់យ៉ាងច្បាស់លាស់នូវការវាយប្រហារលើហេដ្ឋារចនាសម្ព័ន្ធស៊ីវិល និងវត្ថុចាំបាច់ សម្រាប់ការរស់រានមានជីវិតរបស់ជនស៊ីវិល។

របាយការណ៍ពីការបំផ្លិចបំផ្លាញនេះ បានកើតឡើងនៅពេលដែលសង្គ្រាម ដែលបានចាប់ផ្តើមកាលពីថ្ងៃទី២៨ ខែកុម្ភៈ ដោយការវាយលុកតាមអាកាសរួមគ្នា រវាងសហរដ្ឋអាមេរិក និងអ៊ីស្រាអែល បន្តបណ្តាលឲ្យមានអ្នកស្លាប់យ៉ាងច្រើន។ មនុស្សជាង ១.៣៤០នាក់ត្រូវបានសម្លាប់ ចាប់តាំងពីអរិភាពបានចាប់ផ្តើមឡើង ក្នុងនោះរួមទាំងមេដឹកនាំកំពូលរបស់អ៊ីរ៉ង់ផងដែរ។ 

ទីក្រុងតេអេរ៉ង់បានឆ្លើយតបជាមួយនឹងការវាយប្រហារដោយយានដ្រូន និងមីស៊ីល ប្រឆាំងនឹងអ៊ីស្រាអែល ហ្ស៊កដានី អ៊ីរ៉ាក់ និងប្រទេសឈូងសមុទ្រផ្សេងទៀតដែលមានធនធានយោធាអាមេរិក ដោយបណ្តាលឲ្យមានអ្នកស្លាប់ និងរបួស ក៏ដូចជាការខូចខាតយ៉ាងទូលំទូលាយដល់ហេដ្ឋារចនាសម្ព័ន្ធ ខណៈដែលរំខានដល់ទីផ្សារអាកាសចរណ៍ និងថាមពលសកល៕