ប្រព័ន្ធផ្សព្វផ្សាយអ៊ីស្រាអែល នៅថ្ងៃព្រហស្បតិ៍ (ទី២៦ ខែមីនា ឆ្នាំ២០២៦) នេះ បានឲ្យដឹងថា យោធាអ៊ីស្រាអែលត្រូវបានគេរាយការណ៍ថា បាន «សម្លាប់» មេបញ្ជាការកងទ័ពជើងទឹកនៃកងឆ្មាំបដិវត្តន៍ឥស្លាម (IRGC) គឺលោក Alireza Tangsiri។

មន្ត្រីអ៊ីស្រាអែលម្នាក់ និយាយថា លោក Tangsiri ត្រូវបានសម្លាប់ អំឡុងការវាយប្រហារមួយ នៅទីក្រុង Bandar Abbas ហើយបានបន្ថែមថា រូបលោកគឺជាអ្នកទទួលខុសត្រូវ ចំពោះការបិទច្រកសមុទ្រ Hormuz។ នេះបើយោងតាមការចុះផ្សាយរបស់សារព័ត៌មាន Times of Israel។

មិនទាន់មានការអត្ថាធិប្បាយជាផ្លូវការណាមួយពីអ៊ីរ៉ង់ ឬពីយោធាអ៊ីស្រាអែលនៅឡើយទេ ជុំវិញការវាយប្រហារដែលត្រូវបានរាយការណ៍នេះ។ ហើយប្រសិនបើការស្លាប់របស់លោកត្រូវបានបញ្ជាក់អះអាងថា ពិត វានឹងក្លាយជាការវាយប្រហារចុងក្រោយបង្អស់ដែលកំណត់គោលដៅមន្ត្រីជាន់ខ្ពស់អ៊ីរ៉ង់នៅក្នុងសង្គ្រាមដែលកំពុងបន្តមាន។

សហរដ្ឋអាមេរិក និងអ៊ីស្រាអែលបានបើកការវាយប្រហារលើអ៊ីរ៉ង់កាលពីថ្ងៃទី 28 ខែកុម្ភៈ ដែលបានសម្លាប់មេដឹកនាំកំពូលរបស់ប្រទេសនេះ និងបង្កឲ្យមានសង្គ្រាមនៅមជ្ឈិមបូព៌ា។ ចាប់តាំងពីពេលនោះមក ទីក្រុងតេអេរ៉ង់ បានឆ្លើយតបជាមួយនឹងការវាយប្រហារដោយយានដ្រូន និងមីស៊ីល នៅទូទាំងតំបន់ រួមទាំងការវាយប្រហារលើប្រទេសជិតខាងឈូងសមុទ្រ ដែលបញ្ជាក់ថា ពួកគេមិនពាក់ព័ន្ធនឹងជម្លោះ ហើយក៏មិនអនុញ្ញាតឲ្យទឹកដីរបស់ពួកខ្លួនត្រូវបានប្រើប្រាស់ ដើម្បីបើកការវាយប្រហារនោះដែរ។

អ៊ីរ៉ង់ក៏បានបន្តការបិទខ្ទប់ផងដែរ ចំពោះច្រកសមុទ្រ Hormuz ជាផ្លូវទឹកយុទ្ធសាស្ត្រមួយដែលប្រេង ១ភាគ៥ របស់ពិភពលោកត្រូវបានដឹកជញ្ជូនឆ្លងកាត់៕