អគ្គលេខាធិការក្រុមប្រឹក្សាសហប្រតិបត្តិការឈូងសមុទ្រ (GCC) នៅថ្ងៃព្រហស្បតិ៍ (ទី២៦ ខែមីនា ឆ្នាំ២០២៦) នេះ បាននិយាយថា អ៊ីរ៉ង់បានដាក់គោលដៅនៃការវាយប្រហារថ្មីៗភាគច្រើនរបស់ខ្លួន ឆ្ពោះទៅលើប្រទេសឈូងសមុទ្រ ដោយព្រមានថា សកម្មភាពរបស់ទីក្រុងតេអេរ៉ង់បង្កជាការគំរាមកំហែងយ៉ាងធ្ងន់ធ្ងរដល់សន្តិសុខក្នុងតំបន់ និងស្ថិរភាពសេដ្ឋកិច្ចពិភពលោក។

លោក Jasem al-Budaiwi បាននិយាយថា “អ៊ីរ៉ង់បានដាក់គោលដៅវាយប្រហារជាង ៨៥ភាគរយ ឆ្ពោះទៅលើប្រទេសឈូងសមុទ្រ។ អ៊ីរ៉ង់បានកំណត់គោលដៅលើសណ្ឋាគារ ស្ថានទូត បរិក្ខារផ្គត់ផ្គង់ទឹក និងអាកាសយានដ្ឋាន ដោយវាយប្រហារទីតាំងជនស៊ីវិល និងបណ្តាលឲ្យមានការបាត់បង់អាយុជីវិតជនស៊ីវិល»។

ប្រមុខ GCC រូបនេះ បានបន្ថែមថា រដ្ឋឈូងសមុទ្រនឹងមិនទទួលយកការបោកប្រាស់ជាបន្តបន្ទាប់ ឬការប៉ុនប៉ង ដើម្បីបង្ហាញអំពីភាពត្រឹមត្រូវនៃការឈ្លានពាននោះឡើយ ហើយបានបដិសេធកិច្ចប្រឹងប្រែងណាមួយ ដើម្បីប្រែក្លាយប្រទេសឈូងសមុទ្រ ទៅជាសង្វៀនសម្រាប់ដោះស្រាយជម្លោះក្នុងតំបន់ដោយការវាយប្រហារសងសឹក»។

យោងតាមលោក al-Budaiwi បានឲ្យដឹងទៀត រដ្ឋឈូងសមុទ្របានផ្តល់ការធានាដល់អ៊ីរ៉ង់ ប៉ុន្តែប្រទេសទាំងនោះនៅតែត្រូវបានវាយប្រហារដោយមីស៊ីល។ លោកបានដាក់ការទទួលខុសត្រូវទៅលើអ៊ីរ៉ង់ ចំពោះការកើនឡើងនូវភាពតានតឹង នៅក្នុងជម្លោះនេះ ដោយសង្កត់ធ្ងន់ថា ប្រទេសឈូងសមុទ្រមានសិទ្ធិការពារខ្លួន ក្រោមច្បាប់អន្តរជាតិ។

លោកបានចោទប្រកាន់អ៊ីរ៉ង់ថា បានវាយប្រហារជាប្រព័ន្ធ លើរោងចក្រប្រេងនៅឈូងសមុទ្រ ដោយបន្ថែមថា ការវាយប្រហារទាំងនោះបានកំណត់គោលដៅទីតាំង នៅជិតច្រកសមុទ្រហ័រមូស និងវាយប្រហាររោងចក្រចម្រាញ់ប្រេង នៅអារ៉ាប៊ីសាអ៊ូឌីត កាតា អេមីរ៉ាតអារ៉ាប់រួម និងគុយវ៉ែត។ លោកបានអំពាវនាវឲ្យបញ្ឈប់ការវាយប្រហារជាបន្ទាន់ និងបានសង្កត់ធ្ងន់លើតម្រូវការ ក្នុងការរួមបញ្ចូលរដ្ឋឈូងសមុទ្រនៅក្នុងការចរចាណាមួយ ពាក់ព័ន្ធនឹងបទឈប់បាញ់ដែលអាចកើតមាន រវាងសហរដ្ឋអាមេរិក និងអ៊ីរ៉ង់៕