នៅថ្ងៃព្រហស្បតិ៍ (ទី២៦ ខែមីនា ឆ្នាំ២០២៦) នេះ យានដ្រូនកងម៉ារីន ១គ្រឿង បានវាយប្រហារនាវាដឹកប្រេងឆៅ ១គ្រឿង ដែលបានចាកចេញពីប្រទេសរុស្ស៊ី ដោយបណ្តាលឲ្យមានការផ្ទុះនៅក្នុងសមុទ្រខ្មៅ ក្បែរច្រកសមុទ្រ Bosphorus នៃទីក្រុងអ៊ីស្តង់ប៊ុល។ នេះបើយោងតាមការឲ្យដឹងពីរដ្ឋមន្ត្រីក្រសួងដឹកជញ្ជូនទួរគី។

លោករដ្ឋមន្ត្រី Abdulkadir Uraloglu បានប្រាប់ទូរទស្សន៍ Kanal 24 ថា ករណីនេះ ដែលជាហេតុការណ៍មួយ ក្នុងចំណោមឧប្បត្តិហេតុជាច្រើន ក្នុងរយៈពេលប៉ុន្មានខែថ្មីៗនេះ ពាក់ព័ន្ធនឹងនាវាដែលត្រូវបានដាក់ទណ្ឌកម្មដោយលោកខាងលិច ដែលធ្វើដំណើរទៅ ឬមកពីកំពង់ផែរុស្ស៊ី បានកើតឡើងនាព្រឹកព្រលឹម។

លោកបានបញ្ជាក់ថា នាវិកទាំង ២៧នាក់នៅលើនោះ មានសុវត្ថិភាពធម្មតា ដោយបន្ថែមថា ឆ្មាំសមុទ្រត្រូវបានបញ្ជូនទៅកាន់នាវា Altura ដែលមានចម្ងាយប្រហែល ១៨ម៉ាយល៍ណត់ (៣៣គីឡូម៉ែត្រ) ពីចក្រសមុទ្រ Bosphorus ជាច្រកដឹកជញ្ជូនទំនិញដ៏សំខាន់មួយដែលតភ្ជាប់សមុទ្រខ្មៅជាមួយសមុទ្រ Marmara និងមេឌីទែរ៉ាណេ។

លោក Uraloglu បានបន្ថែមថា ការវាយប្រហារនេះ ដែលនៅខាងក្រៅតែបន្តិចនៃដែនទឹកទួរគី ទំនងជាមានគោលបំណងធ្វើឲ្យបន្ទប់ម៉ាស៊ីនលែងដំណើរការនៅក្នុងនាវាមានទង់ជាតិសៀរ៉ាឡេអូន ដែលកំពុងដឹកប្រេងរបស់រុស្ស៊ី។ ទិន្នន័យតាមដានការធ្វើនាវា Refinitiv AIS បានបង្ហាញថា នាវានេះបានចាកចេញពីកំពង់ផែ Novorossiysk របស់រុស្ស៊ី ដោយមានប្រេងឆៅប្រហែល ១លានបារ៉ែល ហើយហាក់ដូចជាផ្ទុកស្ទើរតែពេញតែម្ដង។

ក្រសួងការពារជាតិទួរគីបានឲ្យដឹងនៅថ្ងៃព្រហស្បតិ៍នេះថា ខ្លួនកំពុងតាមដានយ៉ាងដិតដល់អំពីហានិភ័យដែលបង្កឡើងនៅក្នុងសមុទ្រខ្មៅដោយយានដ្រូន ដោយសារតែត្រូវបានប្រើប្រាស់យ៉ាងទូលំទូលាយ ក្នុងសង្គ្រាមរុស្ស៊ី-អ៊ុយក្រែន។ ក្រសួងបានបន្ថែមថា ហានិភ័យ រួមមានយន្តហោះយានដ្រូនបាត់បង់ការគ្រប់គ្រង ឬការហោះដោយឥតទិសដៅឆ្ពោះទៅឆ្នេរសមុទ្រទួរគី៕