សារព័ត៌មានយោធា ISPR របស់ប៉ាគីស្ថាន រាយការណ៍កាលពីថ្ងៃពុធម្សិលមិញថា កងទ័ពជើងទឹកប៉ាគីស្ថាន បានស្វាគមន៍នាវាចម្បាំងកងទ័ពរំដោះប្រជាមានិតចិន សម្រាប់សមយុទ្ធកងទ័ពជើងទឹកទ្វេភាគី ។

 សារព័ត៌មាន ISPR រាយការណ៍ថា នាវា Daqing បានធ្វើដំណើរមកដល់សម្រាប់សមយុទ្ធ Sea Guardian លើកទី ៤ ដែលធ្វើឡើងចាប់ពីថ្ងៃទី ២៥ ខែមីនា រហូតដល់ថ្ងៃទី ២ ខែមេសា ។ សមយុទ្ធយោធានេះ នឹងរួមបញ្ចូលការបាញ់កាំភ្លើងធំ ការល្បាតរួមគ្នា និងប្រតិបត្តិការសន្តិសុខសមុទ្រ ។

 សមយុទ្ធ Sea Guardian មានគោលបំណងពង្រឹងបន្ថែមទៀតនូវទំនាក់ទំនងទ្វេភាគីចិន-ប៉ាគីស្ថាន តាមរយៈការផ្លាស់ប្តូរជំនាញសមុទ្រគ្នាទៅវិញទៅមក និងបង្កើនសមត្ថភាពអន្តរប្រតិបត្តិការរវាងកងទ័ពជើងទឹកមេត្រីភាពទាំង ២ ហើយនិងឆ្លុះបញ្ចាំងពីការប្តេជ្ញាចិត្តចែករំលែកចំពោះសន្តិភាពក្នុងតំបន់ ។

 សមយុទ្ធនេះដែរ នឹងរួមបញ្ចូលសកម្មភាពកំពង់ផែ សកម្មភាពក្នុងសមុទ្រ ការផ្លាស់ប្តូរវិជ្ជាជីវៈ ការចូលរួមពីអ្នកជំនាញ ហើយនិងសិក្ខាសាលាសម្រាប់មន្រ្តីវ័យក្មេងលើបញ្ហាសមុទ្រសហសម័យថ្មី ។

 សារព័ត៌មាន ISPR រាយការណ៍ទៀតថា សមយុទ្ធ Sea Guardian គូសបញ្ជាក់ពីភាពជាដៃគូយុទ្ធសាស្រ្តដ៏ខ្លាំងក្លារវាងប្រទេសទាំង ២ ហើយត្រូវបានគេរំពឹងថានឹងរួមចំណែកចំពោះបរិស្ថានសមុទ្រប្រកបដោយស្ថិរភាពនៅក្នុងតំបន់ ៕