វិមានក្រឹមឡាំងបានឲ្យដឹងនៅថ្ងៃព្រហស្បតិ៍ (ទី២៦ ខែមីនា ឆ្នាំ២០២៦) នេះថា រុស្ស៊ីកំពុងទាក់ទងជាមួយសហរដ្ឋអាមេរិក អំពីការចរចាជុំថ្មី ស្តីពីដំណោះស្រាយសន្តិភាព នៅអ៊ុយក្រែន ឲ្យបានឆាប់តាមដែលស្ថានភាពអំណោយផល។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា៖ «យើងនៅតែបើកចំហ យើងទាក់ទងជាមួយអាមេរិក ហើយយើងកំពុងរំពឹងមានការរៀបចំកិច្ចចរចាជុំបន្ទាប់ ឲ្យបានឆាប់តាមដែលកាលៈទេសៈអំណោយផល»។

ជាមួយគ្នានេះ លោក Peskov បានបដិសេធការលើកឡើងក្នុងអត្ថបទបញ្ចេញទស្សនៈរបស់សារព័ត៌មាន New York Times (NYT) ដែលបានលើកឡើងថា សង្គ្រាមអ៊ីរ៉ង់បានបណ្តាលឲ្យប្រធានាធិបតី លោក Vladimir Putin បាត់បង់ការចាប់អារម្មណ៍ហើយ ក្នុងការចរចាបញ្ចប់ជម្លោះ នៅអ៊ុយក្រែន។

លោក Peskov បានប្រាប់អ្នកសារព័ត៌មានថា៖ «នេះគឺជាប្រឌិតឡើង ពោលគឺជារឿងមិនពិតទាំងស្រុង ដែលមិនត្រូវគ្នានឹងការពិត។ ក្នុងអំឡុងពេលនៃការចរចាត្រីភាគី ដែលបានកើតឡើង វឌ្ឍនភាពមួយចំនួនត្រូវបានធ្វើឡើងឆ្ពោះទៅរកការដោះស្រាយជម្លោះ»។ លោក Peskov បានសង្កត់ធ្ងន់ថា រុស្ស៊ីមិនបានបាត់បង់ការចាប់អារម្មណ៍ ក្នុងការចរចាសន្តិភាពឡើយ ប៉ុន្តែបានបន្ថែមថា បញ្ហាសំខាន់ៗ ក្នុងនោះរួមទាំងបញ្ហាទឹកដីផងដែរ មិនទាន់ត្រូវបានដោះស្រាយនៅឡើយទេ។

គួរបញ្ជាក់ថា អត្ថបទបញ្ចេញទស្សនៈរបស់សារព័ត៌មាន NYT ដែលសរសេរដោយអ្នកកាសែតរុស្ស៊ី Mikhail Zygar បានលើកឡើងថា សេដ្ឋកិច្ចរបស់រុស្ស៊ី បានធ្លាក់ចុះនៅដើមឆ្នាំនេះ ដែលជំរុញឲ្យលោក Putin កាន់តែផ្ដោតខ្លាំងជាពិសេស លើការចរចា ជុំវិញដំណោះស្រាយបញ្ហាអ៊ុយក្រែន។ តែលោក Zygar បានបញ្ជាក់ថា សង្គ្រាមអ៊ីរ៉ង់បានបញ្ច្រាស់សក្ដានុពលទាំងនោះ ដោយជំរុញឲ្យតម្លៃប្រេងហក់ឡើង សម្ពាធសេដ្ឋកិច្ចលើទីក្រុងមូស្គូលែងសូវធ្ងន់ធ្ងរ ហើយការថយការផ្តោតអារម្មណ៍របស់សហរដ្ឋអាមេរិក លើអ៊ុយក្រែន ជាអ្វីដែលធ្វើឲ្យវិមានក្រឹមឡាំងលែងសូវចាប់អារម្មណ៍ស្វែងរកដំណោះស្រាយ៕