ក្រសួងការពារជាតិចិននៅថ្ងៃព្រហស្បតិ៍នេះ អំពាវនាវឲ្យភាគីទាំងអស់បញ្ឈប់សកម្មភាពយោធា នៅក្នុងជម្លោះរវាងសហរដ្ឋអាមេរិក-អ៊ីស្រាអែល និងអ៊ីរ៉ង់ ខណៈការវាយប្រហារមីស៊ីល និងយានដ្រូនទូទាំងតំបន់ឈូងសមុទ្រនៅតែបន្តនៅថ្ងៃព្រហស្បតិ៍នេះ ។

លោក Jiang Bin គឺជាអ្នកនាំពាក្យក្រសួងការពារជាតិចិននិយាយនៅក្នុងសន្និសីទសារព័ត៌មាននាថ្ងៃព្រសហ្បតិ៍នេះថា ចិនជំរុញឲ្យមានកិច្ចខិតខំ ដើម្បីដោះស្រាយជម្លោះតាមរយៈកិច្ចសន្ទនា និងចៀសវាងការកើនឡើងភាពតានតឹង ។

ប្រធានាធិបតីសហរដ្ឋអាមេរិកលោក Donald Trump និយាយថា អ៊ីរ៉ង់ចង់បានកិច្ចព្រមព្រៀង ដើម្បីបញ្ចប់សង្រ្គាមរយៈពេលជិត ៤សប្តាហ៍សប្តាហ៍នេះ ផ្ទុយពីសម្តីរបស់រដ្ឋមន្រ្តីការបរទេសអ៊ីរ៉ងដែលនិយាយថា ប្រទេសរបស់លោកកំពុងពិនិត្យសំណើរបស់សហរដ្ឋអាមេរិក ប៉ុន្តែគ្មានបំណងចូលរួមកិច្ចប្រជុំដើម្បីបញ្ចប់ជម្លោះនោះឡើយ ។

រដ្ឋមន្រ្តីការបរទេសអ៊ីរ៉ង់លោក Abbas Araqchi និយាយថា ស្របពេលពុំមានការសន្ទនា ឬកិច្ចចរចាជាមួយសហរដ្ឋអាមេរិក សារជាច្រើនត្រូវបានផ្តោះផ្តងតាមរយៈអន្តរការី ។

សូមបញ្ជាក់ថា សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការសឹកលើអ៊ីរ៉ង់ កាលពីថ្ងៃទី២៨ ខែកុម្ភៈ ដោយវាយប្រហារទីក្រុងធំៗ រួមទាំងទីក្រុងតេអេរ៉ង់ផងដែរ ។ 

សេតវិមានបានបង្ហាញភាពត្រឹមត្រូវនូវការវាយប្រហារនេះ ដោយលើកឡើងពីការគំរាមកំហែងដោយមីស៊ីល និងនុយក្លេអ៊ែរពីអ៊ីរ៉ង់ ។ 

ដោយឡែក កងឆ្មាំបដិវត្តន៍អ៊ិស្លាមអ៊ីរ៉ង់ បានសងសឹកវិញជាមួយនឹងការវាយប្រហារទ្រង់ទ្រាយធំលើអ៊ីស្រាអែល និងមូលដ្ឋានយោធារបស់សហរដ្ឋអាមេរិកនៅទូទាំងតំបន់មជ្ឈិមបូព៌ា រួមទាំងប្រទេសបារ៉ែន ហ្ស៊កដានី កាតា គូវ៉ែត អារ៉ាប់រួម និងអារ៉ាប៊ីសាអ៊ូ ឌីត ៕