ប្រមុខអង្គការពាណិជ្ជកម្មពិភពលោក(WTO)និយាយនៅថ្ងៃព្រហស្បតិ៍នេះថា ប្រព័ន្ធពហុជាតិបានផ្លាស់ប្តូរជាមូលដ្ឋាន ហើយប្រទេសជាច្រើនត្រូវតែសំឡឹងមើលអនាគត ដើម្បីគិតគូរពីវិធីធ្វើកំណែទម្រង់ប្រព័ន្ធពាណិជ្ជកម្មសកល ។

អគ្គលេខាធិការអង្គការ WTO លោកស្រី Ngozi Okonjo-Iweala និយាយប្រាប់ប្រតិភូនៅពេលបើកសន្និសីទថ្នាក់រដ្ឋមន្រ្តីលើកទី ១៤របស់ WTOនៅក្នុងទីក្រុង Yaounde ប្រទេសកាមរូនថា សណ្តាប់ធ្លាប់ពិភពលោក និងប្រព័ន្ធពហុជាតិដែលពួកយើងធ្លាប់ស្គាល់ បានផ្លាស់ប្តូដោយមិនអាចប្រកែកបាន ។

ស្របពេលដែល ៧២ភាគរយនៃពាណិជ្ជកម្មសកល នៅធ្វើឡើង ក្រោមច្បាប់អង្គការ WTO ជាមួយនឹងកំណើនក្នុងពាណិជ្ជកម្មពាក់ព័ន្ធជាមួយ AI លោកស្រី Okonjo-Iweala និយាយថា ប្រព័ន្ធពាណិជ្ជកម្មពិភពលោក ប្រឈមនឹងភាពពុំច្បាស់លាស់ខ្លាំង ដោយសារជម្លោះនៅតំបន់មជ្ឈិមបូព៌ា និងផលប៉ះពាល់ដោយសារពន្ធសហរដ្ឋអាមេរិកលើបណ្តាប្រទេសនៅជុំវិញពិភពលោក ។

លោកស្រី Okonjo-Iweala បានបង្ហាញបញ្ជីបញ្ហាប្រឈមរបស់អង្គការ WTO រួមទាំងដំណើរជាប់គាំងនៃស្ថាប័នដោះស្រាយវិវាទរបស់អង្គការ WTO និងតម្លាភាពក្នុងការជូនដំណឹងអំពីការប្រើប្រាស់ប្រាក់ឧបត្ថម្ភ ។

លោកស្រី Okonjo-Iweala និយាយថា ប្រទេសសមាជិកត្រឹមតែ ៦៤ប៉ុណ្ណោះ បានជូនដំណឹងពីប្រាក់ឧបត្ថម្ភធននៅអង្គការ WTO អំឡុងឆ្នាំ ២០២៥ ដែលនេះមានន័យថា ប្រទេស និងដែនដីសមាជិក ១០២ផ្សេងទៀត ពុំបានធ្វើនោះឡើយ ៕