ប្រធានាធិបតី លោក Donald Trump បាននិយាយកាលពីថ្ងៃព្រហស្បតិ៍ ទី២៦ ខែឧសភា ថា លោកនឹងចាត់វិធានការប្រតិបត្តិដើម្បីបើកប្រាក់ឲ្យបុគ្គលិកសន្តិសុខអាកាសយានដ្ឋានចំនួន៥០.០០០នាក់ ខណៈកិច្ចព្រមព្រៀងមួយបានជាប់គាំងនៅក្នុងសភាដើម្បីដោះស្រាយកង្វះបុគ្គលិក ដែលបានធ្វើឱ្យការធ្វើដំណើរនៅជុំវិញប្រទេសជាប់គាំង។

លោក Trump បាននិយាយថា លោកបានណែនាំក្រសួងសន្តិសុខមាតុភូមិ «ឱ្យបើកប្រាក់ដល់ភ្នាក់ងារ រដ្ឋបាលសន្តិសុខដឹកជញ្ជូន(TSA)របស់យើងជាបន្ទាន់ ដើម្បីដោះស្រាយស្ថានភាពគ្រាអាសន្ននេះ និងដើម្បីបញ្ឈប់ភាពវឹកវររបស់ក្រុមប្រជាធិបតេយ្យនៅតាមអាកាសយានដ្ឋានឲ្យបានឆាប់រហ័ស។ វាពុំមែនជារឿងងាយស្រួលធ្វើនោះទេ ប៉ុន្តែខ្ញុំនឹងធ្វើវា»។

ក្រសួងសន្តិសុខមាតុភូមិបាននិយាយថា មន្ត្រីសន្តិសុខអាកាសយានដ្ឋានជិត៥០០នាក់បានលាឈប់ ចាប់តាំងពីការចាប់ផ្តើមបិទរដ្ឋាភិបាលដោយផ្នែកកាលពីក្នុងខែកុម្ភៈ ខណៈជម្លោះនៅសភាជុំវិញការផ្តល់មូលនិធិរបស់ក្រសួង បានបង្ខំឱ្យមន្ត្រីរដ្ឋបាលសន្តិសុខដឹកជញ្ជូនធ្វើការដោយគ្មានប្រាក់ឈ្នួល។

ក្រុមប្រជាធិបតេយ្យនៅក្នុងសភា បានផ្អាកការផ្តល់មូលនិធិសម្រាប់ក្រសួងសន្តិសុខមាតុភូមិ ខណៈទាមទារឱ្យមានការផ្លាស់ប្តូរច្បាប់គ្រប់គ្រងប្រតិបត្តិការអន្តោប្រវេសន៍ បន្ទាប់ពីភ្នាក់ងារនៅទីក្រុង Minneapolis បានបាញ់សម្លាប់ពលរដ្ឋអាមេរិក២នាក់។ គណបក្សសាធារណរដ្ឋ បានច្រានចោលដដែលៗនូវសំណើរបស់គណបក្សប្រជាធិបតេយ្យដើម្បីផ្តល់មូលនិធិដល់រដ្ឋបាលសន្តិសុខដឹកជញ្ជូន(TSA) ខណៈកំពុងចរចាកំណែទម្រង់អំពីរបៀបដែលភ្នាក់ងារអនុវត្តច្បាប់អន្តោប្រវេសន៍ និងគយ ដំណើរការ។ រដ្ឋបាលសន្តិសុខដឹកជញ្ជូន(TSA) បានបញ្ជាក់ម្តងទៀតកាលពីថ្ងៃពុធថា ទីភ្នាក់ងារនេះអាចត្រូវបានបង្ខំឱ្យបិទអាកាសយានដ្ឋានតូចៗ ប្រសិនបើបញ្ហាបុគ្គលិកកាន់តែអាក្រក់។