សារព័ត៌មាន Washington Post បានរាយការណ៍កាលពីថ្ងៃទី២៦ មីនាសប្ដាហ៍នេះ ដោយដកស្រង់ប្រភពមិនបញ្ចេញឈ្មោះដែលដឹងបញ្ហានេះថា មន្ទីរបញ្ចកោណកំពុងពិចារណាបង្វែរជំនួយយោធាទុកសម្រាប់អ៊ុយក្រែន ទៅកាន់មជ្ឈិមបូព៌ា វិញ ។

សកម្មភាពដែលអាចធ្វើទៅបាននេះកើតឡើងខណៈអាមេរិកពង្រីកប្រតិបត្តិការប្រឆាំងអ៊ីរ៉ង់ ដែលបង្កើនការព្រួយបារម្ភនៅក្នុងទីក្រុងគីវពីលទ្ធភាពនៃការពន្យារពេលផ្គត់ផ្គង់ប្រព័ន្ធការពារដែនអាកាសដែលត្រូវការជាបន្ទាន់ ស្របពេលមានការវាយប្រហារកាន់តែខ្លាំងពីរុស្ស៊ី។

យោងតាមរបាយការណ៍ អាវុធដែលកំពុងពិចារណារួមមានប្រព័ន្ធការពារដែនអាកាសស្ទាក់ចាប់មីស៊ីល បានបញ្ជាទិញតាមរយៈកម្មវិធីបញ្ជីតម្រូវការអាទិភាពសម្រាប់អ៊ុយក្រែន(PURL)ដែលអនុញ្ញាតឱ្យសមាជិកណាតូផ្សេងទៀតផ្តល់មូលនិធិដល់ការទិញអាវុធរបស់អាមេរិកសម្រាប់អ៊ុយក្រែន។

មន្ត្រីអ៊ុយក្រែនម្នាក់បានប្រាប់សារព័ត៌មាន Kyiv Independent ថា ទីក្រុង គីវ មានការព្រួយបារម្ភអំពីលទ្ធភាពបែបនេះ។

ឆ្លើយតបទៅនឹងរបាយការណ៍នានា អ្នកនាំពាក្យអង្គការណាតូលោកស្រី Alison Hart បានប្រាប់សារព័ត៌មាន European Pravda ថា អ្វីគ្រប់យ៉ាងដែលសម្ព័ន្ធមិត្ត និងដៃគូណាតូបានបង់ប្រាក់តាមរយៈ PURL ត្រូវបានដឹកជញ្ជូន ឬបន្តដឹកជញ្ជូនទៅអ៊ុយក្រែន។

ការផ្លាស់ប្តូរដែលអាចកើតមាននេះ កើតឡើង ខណៈរុស្ស៊ីបង្កើនការវាយប្រហារតាមអាកាស។ ទីក្រុងមូស្គូបានវាយប្រហារដោយយានដ្រូនជិត ១.០០០ គ្រឿងប្រឆាំងអ៊ុយក្រែនក្នុងរយៈពេល ២៤ ម៉ោងរវាងថ្ងៃទី ២៣និង២៤ ខែមីនា ដែលទំនងជាការវាយប្រហារតាមអាកាសដ៏ធំបំផុតមួយនៃសង្គ្រាមទ្រង់ទ្រាយធំ។មន្ត្រីក្រសួងសង្គ្រាមអាមេរិកម្នាក់និយាយថា យោធាសហរដ្ឋអាមេរិកនៅតែប្តេជ្ញាចិត្តធានាថាទាំងកងកម្លាំងអាមេរិក និងសម្ព័ន្ធមិត្តរបស់ពួកគេមានសមត្ថភាពទទួលបានជោគជ័យ ខណៈបដិសេធមិនផ្ដល់ព័ត៌មានលម្អិត ហើយការសម្រេចចុងក្រោយនៅមិនទាន់ធ្វើនៅឡើយ៕