មន្ត្រីបាននិយាយថា ជនភៀសខ្លួនអាហ្វហ្គានីស្ថាន បានរង់ចាំកាលពីថ្ងៃព្រហស្បតិ៍ ទី២៦ ខែមីនា ដើម្បីឆ្លងកាត់នៅច្រកព្រំដែន Torkham រវាងប្រទេសប៉ាគីស្ថាន និងអាហ្វហ្គានីស្ថាន ខណៈអាជ្ញាធរបានបើកច្រកឆ្លងកាត់ឡើងវិញបណ្ដោះអាសន្ន ដើម្បីអនុញ្ញាតឱ្យមនុស្សរាប់រយនាក់វិលត្រឡប់ទៅប្រទេសវិញ។ ច្រកឆ្លងកាត់នៅភាគពាយ័ព្យប្រទេសប៉ាគីស្ថាន ត្រូវបានបើកដើម្បីជួយសម្រួលដល់ការវិលត្រឡប់របស់ជនភៀសខ្លួនអាហ្វហ្គានីស្ថាន បន្ទាប់ពីការណែនាំត្រូវបានចេញដោយក្រសួងមហាផ្ទៃ។

ជនភៀសខ្លួនអាហ្វហ្គានីស្ថាន Zabih Ullah បាននិយាយថា «យើងកំពុងប្រឈមនឹងការលំបាកនៅទីនេះ ហើយកំពុងរង់ចាំព្រំដែនបើកឡើងវិញ ដើម្បីអាចចាកចេញបាន»។ ជនភៀសខ្លួនមួយចំនួន បានសម្តែងការខកចិត្តចំពោះការពន្យារពេលមុនពេលបើកព្រំដែនឡើងវិញ។ ច្រកព្រំដែន Torkham ត្រូវបានបិទសម្រាប់ជនភៀសខ្លួនប្រហែលមួយខែ បន្ទាប់ពីការប៉ះទង្គិចគ្នារវាងប្រទេសជិតខាងទាំងពីរ។

ពាណិជ្ជកម្មនៅច្រកព្រំដែនសំខាន់ៗក៏ត្រូវបានផ្អាកផងដែរ ចាប់តាំងពីប្រទេសប៉ាគីស្ថាន បានបើកការវាយប្រហារតាមអាកាស កាលពីខែតុលា។ អ្នកនាំពាក្យក្រសួងការបរទេសប៉ាគីស្ថាន បាននិយាយកាលពីថ្ងៃព្រហស្បតិ៍ ទី២៦ ខែមីនា ថា យោធាប៉ាគីស្ថាន បានបន្តប្រតិបត្តិការប្រឆាំងអាហ្វហ្គានីស្ថានបន្ទាប់ពីការផ្អាកបណ្តោះអាសន្ន ដោយបានបំផ្លាញក្តីសង្ឃឹមសម្រាប់ឱកាសណាមួយនៃបទឈប់បាញ់អចិន្ត្រៃយ៍។ ការប្រយុទ្ធគ្នាដ៏អាក្រក់បំផុតរបស់ប្រទេសប៉ាគីស្ថាន និងអាហ្វហ្គានីស្ថាន ក្នុងរយៈពេលជាច្រើនឆ្នាំមកនេះ បានផ្ទុះឡើងកាលពីខែមុន ដោយបានឆក់យកអាយុជីវិតមនុស្សយ៉ាងច្រើនពីភាគីទាំងសងខាង។ ប៉ាគីស្ថាន បានទទួលជនភៀសខ្លួនអាហ្វហ្គានីស្ថានជាងពីរលាននាក់ដែលកំពុងជ្រកកោនពីសង្គ្រាមជាបន្តបន្ទាប់នៅក្នុងប្រទេសអាហ្វហ្គានីស្ថានក្នុងរយៈពេលជាច្រើនទសវត្សរ៍មកនេះ។ ទីក្រុងអ៊ីស្លាម៉ាបាដ ចង់ឱ្យពលរដ្ឋអាហ្វហ្គានីស្ថានទាំងអស់ចាកចេញ លើកលែងតែអ្នកដែលមានទិដ្ឋាការមានសុពលភាព ដោយនិយាយថាពួកគេបានជាប់ពាក់ព័ន្ធនឹងការវាយប្រហាររបស់ក្រុមសកម្មប្រយុទ្ធ និងឧក្រិដ្ឋកម្មផ្សេងៗ។