សារព័ត៌មានរដ្ឋកូរ៉េខាងជើង KCNA បានរាយការណ៍នៅថ្ងៃសុក្រ២៧មីនានេះថា ប្រធានាធិបតីបេឡារុសលោក Alexander Lukashenko និងមេដឹកនាំកូរ៉េខាងជើង លោក Kim Jong Un បានពង្រឹងទំនាក់ទំនងប្រទេសរបស់ខ្លួន ដោយចុះហត្ថលេខាលើសន្ធិសញ្ញាមិត្តភាពមួយកាលពីថ្ងៃព្រហស្បតិ៍ ២៦មីនា សប្ដាហ៍នេះ។

លោកLukashenko បានសរសើរមេដឹកនាំកំពូលរូបនេះ ក្នុងអំឡុងពេលទស្សនកិច្ចផ្លូវរដ្ឋទៅកាន់ទីក្រុងព្យុងយ៉ាង។ លោកបានថ្លែងនៅក្នុងសេចក្តីថ្លែងការណ៍ជាសាធារណៈដែលបានចេញផ្សាយនៅលើគេហទំព័ររបស់ប្រធានាធិបតីបេឡារុសថា លោកអាចប្រាប់ថា លោក Kim គឺជាមិត្ត ប្រទេសរបស់អ្នកមានអនាគតដ៏អស្ចារ្យជាមួយប្រជាជនដែលខិតខំប្រឹងប្រែង និងមានវិន័យបែបនេះ។

លោកបន្តថា ហើយរឿងទីពីរដែលរូបលោកបានមើលឃើញគឺ អ្នកមានសមត្ថភាពធ្វើអ្វីៗគ្រប់យ៉ាង ហើយអ្នកធ្វើបានល្អជាងអ្នកដទៃ។

លោក Kim បានឆ្លើយតបដោយនិយាយថា មេដឹកនាំទាំងពីរមានជំហរស្រដៀងគ្នាលើបញ្ហាអន្តរជាតិ និងបានរិះគន់ប្រទេសលោកខាងលិចចំពោះផ្នត់គំនិតអន្តរាគមន៍របស់ពួកគេ។ លោកថាពួកលោកប្រឆាំងនឹងសម្ពាធខុសច្បាប់លើបេឡារុសពីលោកខាងលិច ហើយបង្ហាញការគាំទ្រ និងការយោគយល់ចំពោះវិធានការដែលធ្វើឡើងដោយថ្នាក់ដឹកនាំបេឡារុស ដើម្បីធានាស្ថិរភាពសង្គម-នយោបាយ និងការអភិវឌ្ឍសេដ្ឋកិច្ច។

លោក Lukashenko និងលោក Kim គឺជាសម្ព័ន្ធមិត្តលេចធ្លោចំនួនពីររបស់ប្រធានាធិបតីរុស្ស៊ី លោក Vladimir Putin ហើយប្រទេសទាំងពីរបានផ្តល់ការគាំទ្រផ្នែកភស្តុភារ ឬយោធាសម្រាប់សង្គ្រាមពេញបន្ទុករបស់វិមានក្រឹមឡាំងនៅអ៊ុយក្រែន៕