កាសែត Wall Street Journal បានរាយការណ៍នៅថ្ងៃព្រហស្បតិ៍ (២៦ មីនា) ដោយសម្អាងដល់មន្ត្រីក្រសួងការពារជាតិអាមេរិក ដែលដឹងពីផែនការនេះថា មន្ទីរបញ្ចកោណកំពុងពិចារណាបញ្ជូនកងទ័ពជើងគោកបន្ថែមរហូតដល់ ១០.០០០នាក់ ទៅកាន់តំបន់មជ្ឈិមបូព៌ា ដើម្បីផ្តល់ជម្រើសយោធាបន្ថែមទៀតដល់លោកប្រធានាធិបតី Donald Trump ទោះបីជាលោកកំពុងថ្លឹងថ្លែងលើការចរចាសន្តិភាពជាមួយទីក្រុងតេអេរ៉ង់ក៏ដោយ។

យោងតាមរបាយការណ៍ WSJ កម្លាំងនេះទំនងជានឹងរួមបញ្ចូលទាំងកងរថពាសដែកថ្មើរជើង និងកងរថពាសដែក បន្ថែមពីលើកងពលទ័ពអាកាសឆត្រយោងលេខ៨២ ដែលដាក់ពង្រាយរួចទៅហើយនៅក្នុងតំបន់។ ក្រុមអ្នកជំនាញបានលើកឡើងថា ការដាក់ពង្រាយកងពលឆត្រយោងលេខ៨២ គឺមានគោលបំណងសំដៅលើផលប្រយោជន៍យុទ្ធសាស្ត្ររបស់អ៊ីរ៉ង់ ដូចជាកោះ Kharg ក្នុងឈូងសមុទ្រពែក្ស។

យ៉ាងណាក៏ដោយ របាយការណ៍ WSJ បានកត់សម្គាល់ថា គេមិនទាន់ច្បាស់ទេថាកងកម្លាំងបន្ថែមនេះនឹងត្រូវបញ្ជូនទៅទីណា ឬឈរជើងនៅទីណានោះឡើយ។ លោកស្រី Anna Kelly អ្នកនាំពាក្យរងនៃសេតវិមាន បាននិយាយថា «រាល់ការប្រកាសទាំងអស់ទាក់ទងនឹងការដាក់ពង្រាយកងទ័ពអាមេរិក នឹងចេញពីក្រសួងសង្គ្រាម» គឺសំដៅលើក្រសួងការពារជាតិអាមេរិក។

ដំណឹងបញ្ជូនទ័ពបន្ថែមនេះ បានកើតឡើងស្របពេលដែលលោក Trump បានប្រកាសនៅក្នុងបណ្ដាញសង្គមរបស់លោកកាលពីថ្ងៃព្រហស្បតិ៍ថា៖ តាមការស្នើសុំរបស់របបអ៊ីរ៉ង់ សហរដ្ឋអាមេរិកនឹង «ផ្អាករយៈពេលនៃការបំផ្លាញរោងចក្រថាមពល» រហូតដល់ថ្ងៃទី៦ ខែមេសា ដោយអះអាងថា កិច្ចចរចាជាមួយអ៊ីរ៉ង់កំពុងដំណើរការ៕