ភ្នំពេញ៖ ក្រុមហ៊ុនកូកា-កូឡាកម្ពុជា កាលពីថ្ងៃទី១០ ខែមីនា ឆ្នាំ២០២២ បានប្រកាសគំនិតផ្តួចផ្តើមចុងក្រោយបំផុតរបស់ខ្លួនសំដៅជួយដល់បរិស្ថាន តាមរយៈការផ្លាស់ប្តូរសំបកដបស្ព្រៃ ពីពណ៌បៃតងទៅជាដបថ្លា ក្នុងបំណងជួយសម្រួល និងជម្រុញដល់ការកែច្នៃសំបកវេចខ្ចប់ផលិតផលស្ព្រៃឡើងវិញ។

ការផ្លាស់ប្តូរនេះ ជាផ្នែកមួយនៃកិច្ចខំប្រឹងប្រែងរបស់ក្រុមហ៊ុន កូកា-កូឡា កម្ពុជា ដើម្បីបង្ហាញពីការប្តេជ្ញាចិត្តរបស់ខ្លួនស្របតាមចក្ខុវិស័យពិភពលោកគ្មានសំរាម សំដៅជួយប្រមូល និងកែច្នៃឡើងវិញរាល់សំបកវេចខ្ចប់ប្រភេទដបប្លាស្ទិក ឬកំប៉ុង ដែលក្រុមហ៊ុនបានលក់លើទីផ្សារនៅត្រឹមឆ្នាំ២០៣០។

ការផ្លាស់ប្តូរសំបកដបស្ព្រៃពី ពណ៌បៃតងទៅជាដបថ្លានេះ នឹងធ្វើឱ្យសំបកដបប្លាស្ទិកកាន់តែមានភាពងាយស្រួលខ្លាំងក្នុងការកែច្នៃឡើងវិញ។ បើទោះជាតាមលក្ខណៈបច្ចេកទេសសំបកដបប្លាស្ទិកពណ៌បៃតងអាចកែច្នៃឡើងវិញបានក៏ដោយ ក៏សំបកទាំងនេះជាធម្មតាមិនត្រូវបានកែច្នៃឡើងវិញឡើយ ដោយសារសំបកពណ៌បៃតងនេះចាំបាច់ត្រូវកែច្នៃដាច់ដោយឡែក។ សំបកវេចខ្ចប់ប្លាស្ទិក ពណ៌សថ្លា មានភាពពេញនិយមជាង ហើយត្រូវបានវិស័យឧស្សាហកម្មកែច្នៃឡើងវិញចាត់ទុកថាមានគុណតម្លៃជាង ដែលមានន័យថា សំបកដបថ្លាទាំងនេះ មានតម្រូវការខ្លាំងជាង ហើយងាយស្រួលយកទៅកែច្នៃទៅជាផលិតផលផ្សេងៗ។ 

លោក DAVID WIGGLESWORTH អគ្គនាយកប្រតិបត្តិក្រុមហ៊ុន កូកា-កូឡា កម្ពុជា មានប្រសាសន៍ថា៖ យើងទទួលស្គាល់ថា សំណល់សំបកវេចខ្ចប់ គឺជាបញ្ហាធំ និងជាបញ្ហាបន្ទាន់នៅទូទាំងពិភពលោក និងនៅកម្ពុជាផ្ទាល់។ ប៉ុន្តែបញ្ហានេះ គឺជាបញ្ហាដែលយើងទាំងអស់គ្នាអាចដោះស្រាយបាន ហើយក្រុមហ៊ុនកំពុងប្រឹងប្រែងចាត់វិធានការដើម្បីដោះស្រាយបញ្ហានេះ។ ការផ្លាស់ប្តូរសំបកដបស្ព្រៃ ពីពណ៌បៃតងទៅជាដបថ្លា គឺជាវិធានការជាក់ស្តែងមួយសម្រាប់ម៉ាកយីហោរបស់យើង។ ចក្ខុវិស័យនេះ សំដៅជួយប្រមូល និងកែច្នៃឡើងវិញនូវរាល់សំបកវេចខ្ចប់ប្រភេទដបប្លាស្ទិក ឬកំប៉ុងក្នុងបរិមាណសមមូលទៅនឹងសំបកដបប្លាស្ទិក និងកំប៉ុងទាំងអស់ដែលយើងបានលក់នៅលើទីផ្សារនៅត្រឹមឆ្នាំ២០៣០។ អ្វីដែលកំពុងផ្លាស់ប្តូរនេះគឺពណ៌របស់សំបកវេចខ្ចប់។ រីឯផលិតផលស្ព្រៃ នឹងនៅតែបន្តផ្តល់ជូននូវរសជាតិក្រូចឆ្មារឆ្ងាញ់ពិសារដែលអតិថិជនតែងតែនិយមចូលចិត្តដដែល។ ផលិតផលស្ព្រៃ ត្រូវបានដាក់លក់នៅលើទីផ្សារជាមួយ នឹងសំបកវេចខ្ចប់ពណ៌បៃតង ចាប់តាំងពីផលិតផលនេះត្រូវបានដាក់លក់ជាលើកដំបូង នៅសហរដ្ឋអាមេរិក ក្នុងឆ្នាំ១៩៦១ និងក្នុងប្រទេសកម្ពុជា នៅឆ្នាំ១៩៩៣។ ផលិតផលស្ព្រៃ សំបកដបប្លាស្ទិកថ្លាថ្មីនេះ មានលក់ក្នុងចំណុះ១,៥លីត្រ ដែលនឹងរក្សារសជាតិឆ្ងាញ់ស្រស់ស្រាយពិសេសដូចដើម ហើយអតិថិជនអាចរកទិញបាននៅតាមបណ្តាដេប៉ូចែកចាយផ្សេងៗនៅទូទាំងប្រទេស៕ អត្ថបទ៖ រដ្ឋា