គណៈកម្មាធិការអូឡាំពិកអន្តរជាតិ (IOC) បាននិយាយកាលពីថ្ងៃព្រហស្បតិ៍ (២៦ មីនា) ថា មានតែអត្តពលិកមានភេទស្រីតាមជីវសាស្ត្រ ដែលត្រូវបានកំណត់ភេទតាមរយៈការធ្វើតេស្តពិនិត្យហ្សែនតែម្តងគត់ប៉ុណ្ណោះ ទើបមានសិទ្ធិចូលរួមក្នុងព្រឹត្តិការណ៍ប្រភេទនារី នៅក្នុងការប្រកួតកីឡាអូឡាំពិក។

ច្បាប់ថ្មីនេះ គឺស្មើនឹងការហាមឃាត់អត្តពលិកប្តូរភេទ មិនឱ្យចូលរួមប្រកួតក្នុងវិញ្ញាសាប្រភេទនារីនៅអូឡាំពិក។ កាលពីមុន អត្តពលិកប្តូរភេទមានសិទ្ធិចូលរួមប្រកួតបាន ដរាបណាមានការអនុញ្ញាតពីសហព័ន្ធកីឡារៀងៗខ្លួន។

បន្ទាប់ពីដំណាក់កាលពិគ្រោះយោបល់រយៈពេល ១៨ខែមក គណៈកម្មាធិការ IOC បានបើកបង្ហាញគោលការណ៍របស់ខ្លួនសម្រាប់ការប្រកួតកីឡាអូឡាំពិក អូឡាំពិកយុវជន និងការប្រកួតជម្រុះនានា។

គោលការណ៍នេះ ត្រូវបានរំពឹងទុកយ៉ាងទូលំទូលាយថា នឹងត្រូវយកទៅអនុវត្តដោយសហព័ន្ធកីឡាអន្តរជាតិ ហើយនឹងក្លាយជាច្បាប់សកលសម្រាប់អ្នកប្រកួតប្រជែងក្នុងវិស័យកីឡាស្រ្តីកម្រិតខ្ពស់ បន្ទាប់ពីការប្រើប្រាស់បទបញ្ញត្តិខុសៗគ្នាអស់ជាច្រើនឆ្នាំ ដែលបង្កឱ្យមានភាពចម្រូងចម្រាសធំៗកើតឡើង។

IOC បាននិយាយក្នុងសេចក្ដីថ្លែងការណ៍មួយថា រាល់អត្តពលិកទាំងអស់ដែលចង់ជម្រុះ ឬចូលរួមក្នុងព្រឹត្តិការណ៍ប្រភេទនារី ចាប់ពីការប្រកួតកីឡាអូឡាំពិកឆ្នាំ២០២៨ នៅទីក្រុង Los Angeles សហរដ្ឋអាមេរិក (ឬហៅថា LA2028) តទៅ នឹងត្រូវឆ្លងកាត់ការធ្វើតេស្តហ្សែន SRY ដើម្បីកំណត់សិទ្ធិចូលរួម។ IOC បានបញ្ជាក់ថា នឹងមានការលើកលែងសម្រាប់ករណីកម្រនៃការវិវត្តផ្នែកភេទ។ ចំពោះអត្តពលិកដែលមានលទ្ធផលតេស្តហ្សែន SRY វិជ្ជមាន នឹងនៅតែបន្តទទួលបានការដាក់ឱ្យចូលរួមក្នុងប្រភេទចំណាត់ថ្នាក់កីឡាផ្សេងទៀតដែលពួកគេមានលក្ខណៈសម្បត្តិគ្រប់គ្រាន់៕