ក្រុមអ្នកមនុស្សធម៌អង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា ចំនួនជនស៊ីវិលស្លាប់ និងខូចខាត កើនឡើង នៅក្នុងប្រទេសអ៊ីរ៉ង់ និងលីបង់ ខណៈដែលគ្រួសារដែលផ្លាស់ទីលំនៅ នៅក្នុងតំបន់ហ្កាហ្សា កំពុងតស៊ូទ្រាំនឹងភ្លៀងធ្លាក់ខ្លាំង ការខូចខាត និងឧបសគ្គក្នុងការផ្តល់ជំនួយ នៅតែបន្ត។  

ការិយាល័យសម្របសម្រួលកិច្ចការមនុស្សធម៌អង្គការសហប្រជាជាតិ (OCHA) បាននិយាយថា នៅក្នុងប្រទេសអ៊ីរ៉ង់ ជនរងគ្រោះ ត្រូវបានរាយការណ៍ នៅក្នុងខេត្តយ៉ាងហោចណាស់ ២០ ក្នុងចំណោមខេត្តសរុបចំនួន ៣១ ដោយចំនួនខ្ពស់បំផុត ត្រូវបានរាយការណ៍ នៅក្នុងទីក្រុងតេអេរ៉ង់ និង Hormozgan។

ក្រសួងសុខាភិបាលអ៊ីរ៉ង់ បានរាយការណ៍ថា គិតត្រឹមថ្ងៃពុធ មានជនរងគ្រោះចំនួន ២៣.០០០នាក់ ពីអរិភាព ក្នុងនោះមានកុមារចំនួន ១.៨០១នាក់ និងស្ត្រីចំនួន ៤.១៥០នាក់។ ក្រសួងក៏បានរាយការណ៍ថា មានមនុស្សចំនួន ២៣នាក់បានស្លាប់ និងរ ១១២នាក់ បានរងរបួស ក្នុងចំណោមបុគ្គលិកថែទាំសុខភាព គិតត្រឹមថ្ងៃពុធ។

សមាគមអឌ្ឍចន្ទក្រហមអ៊ីរ៉ង់ (IRCS) បានរាយការណ៍ថា មនុស្សម្នាក់ បានស្លាប់ និង ១៤នាក់ រងរបួស ក្នុងចំណោមបុគ្គលិកសង្គ្រោះ គិតត្រឹមថ្ងៃព្រហស្បតិ៍។ OCHA បាននិយាយថា អរិភាពបានបង្ខំឲ្យប្រជាជនផ្លាស់ទីលំនៅ ទៅកាន់តំបន់ដែលមានសុវត្ថិភាពជាងមុន ដែលបង្កើនភាពងាយរងគ្រោះរបស់ពួកគេ និងជារឿយៗរំខានដល់ការទទួលបានការគាំទ្រចាំបាច់ សេវាកម្មជាមូលដ្ឋាន និងការធានានូវតម្រូវការចាំបាច់សម្រាប់ជីវភាពរស់នៅ៕