មីយ៉ានម៉ា៖ ក្រុមបាតុករប្រឆាំងរដ្ឋប្រហារ របស់សហភាពមីយ៉ានម៉ាក្នុងទីក្រុងយ៉ាងហ្គោន បានគប់គ្រាប់បែកភ្លើងកែច្នៃទៅលើកងទ័ព បន្ទាប់ពីអ្វីដែលទំនងជាមានការបាញ់ប្រហារ ដោយកាំភ្លើងគ្រាប់ពិតកាលពីថ្ងៃពុធ។ វីដេអូពីស្រុក Insein នៃអតីតរដ្ឋធានីមួយនេះ បានបង្ហាញពីក្រុមបាតុកររត់ភៀសខ្លួនភ្លាមៗ នៅពេលលឺស្នូរសំឡេងគ្រាប់កាំភ្លើង មុនពេលរត់រកកន្លែងលាក់ខ្លួននៅពីក្រោយរបាំងការពារ បាវខ្សាច់ដែលបានលើកគរលើគ្នាខ្ពស់ៗ។
អ្នកខ្លះបានគប់គ្រាប់បែកភ្លើងកែច្នៃផលិតចេញពីដបកែវ ដែលផ្ទុកពេញដោយសាំងរំលងរបាំងការពារ ហើយអ្នកខ្លះទៀតបានបាញ់ដោយប្រើចម្ពាម មុនពេលកងទ័ពបាញ់ឧស្ម័នបង្ហូរទឹកភ្នែកទៅលើពួកគេ។ ការគប់ឧបករណ៍ប្រើដោយភ្លើងរបស់ក្រុមបាតុករ ហាក់មិនមានប្រយោជន៍ទេ ព្រោះកងទ័ពនៅឆ្ងាយពីពួកគេ ដែលមិនអាចគុបទៅដល់ ប៉ុន្តែវាអាចបង្ហាញពីវិធីបង្ក្រាបកាន់តែសាហាវរបស់យោធា ក្នុងចំណោមក្រុមអ្នកតវ៉ាមួយចំនួន ស្របពេលចំនួនអ្នកស្លាប់ដោយសារការបង្ក្រាប របស់កងកម្លាំងនគរបាល និងកងទ័ពបានកើនឡើងដល់ជាង ២០០នាក់។ កាលពីថ្ងៃអាទិត្យ យ៉ាងហោចណាស់បាតុករប្រឆាំងរដ្ឋប្រហារចំនួន ៣៤នាក់ត្រូវបានបាញ់សម្លាប់ នៅក្នុងតំបន់ឧស្សាហកម្មយ៉ាងហ្គោន ទោះបីជាតួលេខពិតប្រាកដអាចខ្ពស់ជាងនេះក៏ដោយ។
ចំណែកនៅសង្កាត់ Dawei វិញ ក្រុមអ្នកតវ៉ាប្រឆាំងរដ្ឋប្រហារនៅសហភាពមីយ៉ាន់ម៉ា បានចូលជាកម្លាំងនៅតាមតំបន់ជនបទមួយចំនួន នៅភាគខាងត្បូងរបស់ប្រទេសនេះកាលពីថ្ងៃពុធ ដោយមានមនុស្សរាប់រយនាក់មកពីភូមិចំនួន២ នៅសង្កាត់នេះរួមគ្នាដើម្បីអំពាវនាវឱ្យយោធាចុះចេញពីតំណែង និងដើម្បីឲ្យលទ្ធិប្រជាធិបតេយ្យវិលត្រឡប់។ ក្រុមអ្នកតវ៉ារាប់បញ្ចូលទាំងព្រះសង្ឃ ប្រឆាំងនឹងការដណ្ដើមក្ដោបក្ដាប់របស់យោធា នៅសហភាពមីយ៉ាន់ម៉ា បានវិលត្រឡប់ទៅតវ៉ានៅតាមផ្លូវវិញនានាកាលពីថ្ងៃពុធ ទោះបីជាមានការបង្ក្រាបយ៉ាងសាហាវទៅលើបាតុកម្មស្ងៀមស្ងាត់ ដែលមានចំនួនកាន់តែកើនឡើងក្ដី ដោយមានអ្នកដើរក្បួនជាច្រើននៅតាមទីប្រជុំជនសំខាន់ៗ និងទីក្រុងមួយចំនួនក្នុងនោះមានក្រុង Mandalay ផងដែរ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
