ដោយផ្អែកលើការដកស្រង់សម្តីពីមន្ត្រីអាមេរិក ២រូប និងប្រភពចំនួន ២ ផ្សេងទៀត ដែលដឹងអំពីបញ្ហានេះ របាយការណ៍របស់សារព័ត៌មាន Axios បានបង្ហាញថា មន្ទីរបញ្ចកោណកំពុងរៀបចំជម្រើសយោធា សម្រាប់ «ការវាយប្រហារចុងក្រោយ» នៅក្នុងសង្គ្រាមអ៊ីរ៉ង់ ដែលពាក់ព័ន្ធនឹងការប្រើប្រាស់កងកម្លាំងជើងគោក និងការទម្លាក់គ្រាប់បែកកាន់តែខ្លាំងជាងមុន។

បើយោងតាមរបាយការណ៍នេះ បានឲ្យដឹងថា «ការដំឡើងរឹតតែខ្លាំងឡើងនូវប្រតិបត្តិការយោធា» ត្រូវបានគេរំពឹងនឹងមាន ប្រសិនបើវឌ្ឍនភាពក្នុងការចរចា រវាងទីក្រុងតេអេរ៉ង់ និងវ៉ាស៊ីនតោន មិនមានអ្វីប្រសើរនោះ។ តាមរយៈប្រភពទាំងនោះ របាយការណ៍បានបញ្ជាក់ថា ជម្រើសនានា ដូចជាការលុកលុយកោះសំខាន់ៗជាយុទ្ធសាស្ត្រ ដែលមាន Kharg, Larak, Abu Musa និងកោះដទៃទៀត រួមជាមួយនឹងការបិទផ្លូវនាវាដែលដឹកប្រេងអ៊ីរ៉ង់នៅភាគខាងកើតនៃច្រកសមុទ្រ Hormuz គឺស្ថិតនៅក្នុងការពិភាក្សា។

របាយការណ៍នេះ បានបន្ថែមទៀតថា មន្ត្រីអាមេរិកមួយចំនួន ជឿថា «ការបង្ហាញកម្លាំងដ៏លើសលប់» ដើម្បីបញ្ចប់ជម្លោះ នឹងផ្តល់ឲ្យសហរដ្ឋអាមេរិកនូវការមានប្រៀបកាន់តែខ្លាំង អំឡុងការចរចា។ ប្រភពមួយដែលដឹងពីកិច្ចប្រឹងប្រែងចរចា បាននិយាយថា ទួរគី ប៉ាគីស្ថាន និងអេហ្ស៊ីប កំពុងបន្តកិច្ចប្រឹងប្រែងរបស់ខ្លួន ដើម្បីរៀបចំការចរចា រវាងភាគីទាំងអស់។

ប្រភពដដែលបានកត់សម្គាល់ថា អ៊ីរ៉ង់បានបដិសេធការទាមទារដំបូងរបស់សហរដ្ឋអាមេរិក ប៉ុន្តែមិនទាន់ដកខ្លួនចេញពីការចរចាទាំងស្រុងនៅឡើយទេ។ បើទោះបីជាមានសេចក្តីថ្លែងការណ៍របស់ប្រភពនានាក៏ដោយ ក៏ប្រធានាធិបតីអាមេរិក លោក Donald Trump ត្រូវបានគេរាយការណ៍ថា មិនទាន់ឈានដល់ការសម្រេចចិត្តលើសេណារីយ៉ូណាមួយនៅឡើយទេ។ យ៉ាងណាក្ដី លទ្ធភាពដែលអាចមានប្រតិបត្តិការជើងគោកណាមួយ ត្រូវបានមន្ត្រីសេតវិមាន មើលឃើញថា គ្រាន់តែជា «សន្មតិកម្ម» ប៉ុណ្ណោះ៕