នៅថ្ងៃសុក្រនេះ ព្យុះស៊ីក្លូន Narelle បានបោកបក់ដល់ដីគោក បង្កការអាក់ខានដល់ផលិតកម្មនៅតាមរោងចក្រផលិតឧស្ម័ន្ធធម្មជាតិរាវ និងកាត់ផ្តាច់ចរន្តអគ្គិសនីដល់ប្រជាពលរដ្ឋរស់នៅក្នុងរដ្ឋ Western Australia ប្រទេសអូស្រ្តាលី ។

 ព្យុះស៊ីក្លូន Narelle បានថមថយកម្លាំងពីព្យុះកម្រិតទី ៤ មកនៅព្យុះកម្រិតទី ៣វិញ ពេលវាបោកបក់ដល់ដីគោកនៅទីក្រុង Exmouth ស្ថិតក្នុងតំបន់ភាគពាយ័ព្យអូស្រ្តាលី ដោយកាត់ផ្តាច់ចរន្តអគ្គិសនីនៅក្នុងទីក្រុងមួយនេះ និងបក់បំប៉ើងដំបូលជំរំជម្លៀសខ្លួន បង្ខំឲ្យអ្នកស្រុកបំលាស់ទីបន្តទៅកន្លែងមួយផ្សេងទៀត ។

 ក្រុមហ៊ុន Chevron និយាយថា ពួកគេកំពុងធ្វើការស្តាឡើងវិញផលិតកម្មនៅរោងចក្រថាមពល Gorgon និងរោងចក្រថាមពល Wheatstone LNG ស្ថិតក្នុងរដ្ឋ Western Australia បន្ទាប់ពីដាច់ចរន្តអគ្គិសនី ដោយសារព្យុះស៊ីក្លូន Narelle ។

 ដោយឡែក ក្រុមហ៊ុនថាមពល Woodside និយាយថា ផលិតកម្មរបស់ខ្លួននៅរោងចក្រឧស្ម័ន Karratha ត្រូវបានអាក់ខានដោយសារព្យុះស៊ីក្លូន Narelle ។ 

រោងចក្រឧស្ម័ននេះដែរ គឺជារោងចក្រដំណើរការនៅមាត់សមុទ្រសម្រាប់គម្រោង North West Shelf ដែលជាគម្រោងឧស្ម័ន LNG វ័យចំណាស់បំផុត និងធំបំផុតទី ២របស់អូស្រ្តាលី កំពុងផលិតឧស្ម័នទម្ងន់ ១៤,៣លានតោន ក្នុង ១ឆ្នាំ ពោលគឺធ្លាក់ចុះពីចំណុះ ១៦,៩លានតោន ក្នុង ១ឆ្នាំ ក្រោយពួកគេបានបិទម៉ាស៊ីនផលិតមួយក្នុងចំណោមម៉ាស៊ីនផលិតចំនួន ៥របស់ខ្លួន ៕