នៅថ្ងៃសុក្រ (ទី២៧ ខែមីនា ឆ្នាំ២០២៦) នេះ ប្រទេសអូទ្រីស បានប្រកាសថា ឆាប់ៗនេះ ខ្លួននឹងហាមឃាត់ការប្រើប្រាស់សង្គម សម្រាប់កុមារអាយុក្រោម ១៤ឆ្នាំ ដោយនិយាយថា វាបានបង្កើតឲ្យមានទម្លាប់ញៀន ជំរុញដល់អំពើហិង្សា ផ្សព្វផ្សាយព័ត៌មានមិនពិត និងកំណត់ស្តង់ដារសម្រស់មិនប្រាកដនិយម។

អនុអធិការបតី លោក Andreas Babler បានប្រាប់សន្និសីទសារព័ត៌មានមួយថា៖ «វាស្ទើរតែមិនអាចទៅរួចទេ សម្រាប់ឪពុកម្តាយក្នុងការគ្រប់គ្រងការប្រើប្រាស់របស់កូនៗរបស់ពួកគាត់ នៅលើវេទិកាទាំងនេះ ដែលត្រូវបានរចនាឡើង ដើម្បីធ្វើឲ្យពួកគេប្រើប្រាស់ជាប់ជានិច្ច»។

លោក Babler បានបន្តថា ប្រទេសដែលមានប្រជាជន ៩,២លាននាក់នេះ សង្ឃឹមថា នឹងអាចពង្ហាញពីច្បាប់ថ្មី «នៅដើមរដូវក្តៅនេះ» ដើម្បីឲ្យវាអាចចូលជាធរមាន «ឲ្យបានឆាប់តាមដែលអាចធ្វើទៅបាន»។ លោកបាននិយាយថា ប្រទេសអូទ្រីសនឹងកំណត់គោលដៅវេទិកានានា ដែលប្រើ «ក្បួនដោះស្រាយ (Algorithms) ដែលបង្កើតជាការញៀន រកប្រាក់ចំណេញ និងមានផលប៉ះពាល់ដែលបង្កគ្រោះថ្នាក់»។

លោក Babler បានបន្ថែមថា កុមារ «ត្រូវបានបណ្ដោយឲ្យប្រើប្រាស់ឧបករណ៍ផ្ទាល់ខ្លួនរបស់ពួកគេ នៅក្នុងពិភពលោកមួយដែលពួកគេប្រឈមជាមួយ ឧទាហរណ៍ ដូចជាស្តង់ដារសម្រស់មិនប្រាកដនិយម ការជំរុញឲ្យមានអំពើហិង្សាកាន់តែខ្លាំង ព័ត៌មានក្លែងក្លាយ និងជាទីដែលពួកគេក៏ត្រូវបានទទួលឥទ្ធិពលពីមាតិការនានាផងដែរ»។ ប៉ុន្តែលោកបានបញ្ជាក់បន្ថែមថា នៅតែមិនទាន់មានការឯកភាពគ្នា ក្នុងចំណោមគណបក្សទាំង៣ នៅក្នុងរដ្ឋាភិបាលចម្រុះ ស្តីពីវិធីសាស្ត្រផ្ទៀងផ្ទាត់ដែលនឹងត្រូវដាក់ឲ្យអនុវត្តនោះឡើយ។

ការពិសោធន៍រយៈពេល ៣សប្តាហ៍ «គ្មានទូរស័ព្ទចល័ត» ដែលដឹកនាំដោយក្រសួងអប់រំ និងពាក់ព័ន្ធនឹងសិស្សចំនួន ៧២.០០០នាក់ និងក្រុមគ្រួសាររបស់ពួកគេ ទើបតែបានបញ្ចប់នៅក្នុងប្រទេសអូទ្រីស។ រដ្ឋមន្ត្រីក្រសួងអប់រំ លោក Christoph Wiederkehr បានប្រាប់សន្និសីទសារព័ត៌មានថា៖ «មតិប្រតិកម្មដែលយើងទទួលបាន គឺថា នេះគឺជាបទពិសោធន៍ដកខ្លួនមួយប្រភេទ សម្រាប់សិស្ស ហើយពួកគេ ដឹងអំពីផលប៉ះពាល់ដ៏គ្រោះថ្នាក់នៃការប្រើប្រាស់ហួសប្រមាណរបស់ពួកគេ»៕