យោធាអាមេរិកបានបាញ់មីស៊ីល Tomahawk មិនតិចជាង ៨៥០គ្រាប់ ក្នុងរយៈពេល ៤សប្តាហ៍នៃសង្គ្រាមជាមួយអ៊ីរ៉ង់ ដោយបានធ្វើឲ្យខាតបង់អាវុធកំនត់គោលដៅជាក់លាក់ ក្នុងអត្រាមួយដែលបាននាំឲ្យមន្ត្រីមន្ទីរបញ្ចកោណមួយចំនួនមានក្ដីបារម្ភ និងជំរុញឲ្យមានការពិភាក្សាផ្ទៃក្នុងអំពីរបៀប ដែលអាចផលិតបានកាន់តែច្រើនបន្ថែម។ នេះបើយោងតាមរបាយការណ៍របស់សារព័ត៌មាន Washington Post ដោយដកស្រង់សម្តីពីបុគ្គលដែលដឹងពីបញ្ហានេះ។

សារព័ត៌មាន Reuters មិនអាចផ្ទៀងផ្ទាត់របាយការណ៍នេះភ្លាមៗបានឡើយ។ ហើយក្រសួងការពារជាតិអាមេរិក និងសេតវិមានមិនបានឆ្លើយតបភ្លាមៗនោះដែរ ចំពោះសំណើរបស់សារព័ត៌មាន Reuters សម្រាប់ការអត្ថាធិប្បាយ។

មីស៊ីល Tomahawk ដែលអាចបាញ់ចេញពីនាវាចម្បាំង និងនាវាមុជទឹករបស់កងទ័ពជើងទឹកអាមេរិក គឺជាគ្រឿងយុទ្ធោបករណ៍គ្រឹះនៃប្រតិបត្តិការយោធាអាមេរិក ចាប់តាំងពីមានការប្រើប្រាស់ប្រយុទ្ធលើកដំបូង ក្នុងអំឡុងសង្គ្រាមឈូងសមុទ្រពែរ្សឆ្នាំ១៩៩១។ 

តែយ៉ាងណាក្ដី មានតែ២-៣រយគ្រាប់ប៉ុណ្ណោះ ត្រូវបានផលិតជារៀងរាល់ឆ្នាំ ដែលរាំងស្ទះការផ្គត់ផ្គង់ទូទាំងពិភពលោក។ មន្ទីរបញ្ចកោណមិនបានបង្ហាញជាសាធារណៈ អំពីទំហំនៃបញ្ជីសារពើភ័ណ្ឌមីស៊ីលរបស់ខ្លួនឡើយ។

ដោយត្រូវបានគេស្គាល់ដោយសារសមត្ថភាពបាញ់រយៈចម្ងាយឆ្ងាយរបស់វា ដែលមានចម្ងាយលើសពី ១.០០០ម៉ាយល៍ (១.៦០៩គីឡូម៉ែត្រ) មីស៊ីល Tomahawks អាចឲ្យកងកម្លាំងអាមេរិកវាយប្រហារគោលដៅ ដោយមិនធ្វើឲ្យអ្នកបើកយន្តហោះចូលទៅក្នុងដែនអាកាសដែលមានការការពារយ៉ាងខ្លាំងនោះឡើយ៕