ប្រមុខសិទ្ធិមនុស្សរបស់អង្គការសហប្រជាជាតិ (UN) នាថ្ងៃសុក្រ (ទី២៧ ខែមីនា ឆ្នាំ២០២៦) នេះ បានជំរុញឲ្យទីក្រុងវ៉ាស៊ីនតោនបញ្ចប់ការស៊ើបអង្កេតរបស់ខ្លួន ជុំវិញការវាយប្រហារដ៏សាហាវ លើសាលាបឋមសិក្សាមួយកន្លែង ក្នុងប្រទេសអ៊ីរ៉ង់ នៅឯកិច្ចប្រជុំក្រុមប្រឹក្សាសិទ្ធិមនុស្ស UN ដោយមានរដ្ឋមួយចំនួនសម្តែងការខឹងសម្បា ចំពោះហេតុការណ៍នោះ។

ការជជែកពិភាក្សាបន្ទាន់នៅក្រុមប្រឹក្សានេះ ក្នុងទីក្រុងហ្សឺណែវ ប្រទេសស្វីស ត្រូវបានកោះប្រជុំដោយអ៊ីរ៉ង់ ដើម្បីពិភាក្សា អំពីការវាយប្រហារលើសាលា Shajareh Tayyebeh ដែលទីក្រុងតេអេរ៉ង់ បញ្ជាក់ថា បានសម្លាប់កុមារ និងគ្រូបង្រៀនជាង ១៧៥នាក់ អំឡុងថ្ងៃដំបូងនៃសង្គ្រាមក្នុងតំបន់រយៈពេលជិត ១ខែ ដែលបានចាប់ផ្តើមជាមួយនឹងការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែល។

សារព័ត៌មាន Reuters បានរាយការណ៍ដំបូងគេកាលពីថ្ងៃទី៥ ខែមីនាថា អ្នកស៊ើបអង្កេតយោធាសហរដ្ឋអាមេរិកជឿថា វាទំនងជាកងកម្លាំងសហរដ្ឋអាមេរិកត្រូវទទួលខុសត្រូវ ប៉ុន្តែមិនទាន់ឈានដល់ការសន្និដ្ឋានចុងក្រោយ ឬបញ្ចប់ការស៊ើបអង្កេតរបស់ពួកគេនៅឡើយទេ។ ចាប់តាំងពីពេលនោះមក មន្ទីរបញ្ចកោណបានបង្កើនការស៊ើបអង្កេត។ អ៊ីស្រាអែលក៏បានឲ្យដឹងផងដែរថា ខ្លួនកំពុងស៊ើបអង្កេតហេតុការណ៍នេះ។

ប្រមុខសិទ្ធិមនុស្ស UN លោក Volker Turk បានអំពាវនាវឲ្យទីក្រុងវ៉ាស៊ីនតោនបញ្ចប់ការស៊ើបអង្កេតរបស់ខ្លួនឲ្យបានឆាប់តាមដែលអាចធ្វើទៅបាន និងចេញផ្សាយលទ្ធផល។ បន្ទាប់ពីមានកិច្ចប្រជុំជាមួយមន្ត្រីអាមេរិក នៅទីក្រុងវ៉ាស៊ីនតោន ក្នុងសប្តាហ៍នេះ លោកបាននិយាយតាមរយៈវីដេអូថា៖ «ត្រូវតែមានយុត្តិធម៌សម្រាប់គ្រោះថ្នាក់ដ៏គួរឲ្យតក់ស្លុតដែលបានកើតឡើសងនេះ»។

នៅពេលត្រូវបានស្នើសុំការអត្ថាធិប្បាយ បេសកកម្មការទូតរបស់អ៊ីស្រាអែលប្រចាំ UN នៅទីក្រុងហ្សឺណែវ បានរិះគន់អ៊ីរ៉ង់ ចំពោះការវាយប្រហារលើជនស៊ីវិល នៅទូទាំងតំបន់។ ចំណែកបេសកកម្មសហរដ្ឋអាមេរិក បានបង្វែរសំណួរអំពីឧប្បត្តិហេតុនេះ និងស្ថានភាពនៃការស៊ើបអង្កេតទៅក្រសួងការបរទេស ដែលមិនបានឆ្លើយតបភ្លាមៗឡើយ ចំពោះការសុំការអត្ថាធិប្បាយ៕