បាល់ទាត់៖ ​​នៅសល់តែ ២៣៥ថ្ងៃ​ទៀត​ប៉ុណ្ណោះ​ព្រឹត្តិការណ៍​បាល់ទាត់​ពិភពលោក FIFA World Cup 2022 នឹង​ឈានចូលមកដល់​នៅ​ទឹកដី​កាតា​។ ​​បាល់​ដែល​ត្រូវ​ប្រើប្រាស់​ក្នុង​ព្រឹត្តិការណ៍​ ត្រូវ​បានដាក់​បង្ហាញ​ជា​ផ្លូវការ​នៅ​ថ្ងៃ​ពុធ​ម្សិល​មិញ​នេះ ជា​បាល់​ដែលមាន​ល្បឿន​លឿន​បំផុត​នៅលើ​អាកាស​ជាង​បាល់​នៅ World Cup ណាៗ​ទាំងអស់​ក្នុង​ប្រវត្តិសាស្ត្រ នេះ​បើតាម​ការបញ្ជាក់​របស់ក្រុម Adidas ដែលជា​ក្រុម​ផលិត​បាល់ទាត់​សំរាប់ World Cup ១៤ព្រឹត្តិការណ៍​ជាប់​គ្នា​មកហើយ​។

​​បាល់​ដែល​ប្រើប្រាស់​នៅ World Cup ឆ្នាំនេះ​ត្រូវបាន​គេ​ឱ្យ​ឈ្មោះថា Al Rihla ជា​ភាសា​អារ៉ាប់ និង​មានន័យ​ជា​ភាសា​ខ្មែរ​ថា ការធ្វើដំណើរ ដែល​ត្រូវបាន​គេ​ផលិតឡើង​ក្នុង​កំរិត​គុណភាព​ខ្ពស់តាមរយៈ​សុក្រឹតភាព​របស់​វា​។ ​​ជាមួយគ្នា​នោះដែរ ថ្ងៃ​សុក្រ​ស្អែក​នេះ​ការចាប់​ឆ្នោត​បែងចែក​ពូ​ល​ នឹងត្រូវ​ធ្វើឡើង​នៅ​ទីក្រុង​ដូ​ហា​ប្រទេស​កាតា ស្រប​ពេលដែល​មកដល់​ពេលនេះ​មាន​ប្រទេស​ចំនួន ២៩ ហើយ​បាន​កក់​កៅអី​នៅ World Cup 2022 នៅសល់តែ​ការប្រកួត Play-Off តំបន់​អឺរ៉ុប​ដែល​ត្រូវបាន​ពន្យារ​ពេល និងការប្រកួត Play-Off អន្តរទ្វីប​៕

​អត្ថបទ​៖​នាង សុភា​វុ​ធ