ការិយាល័យFBI បាននិយាយថា ក្រុមចោរព័ត៌មានវិទ្យាមានទំនាក់ទំនងជាមួយអ៊ីរ៉ង់ បានលួចចូលទៅក្នុងប្រអប់សារអេឡិចត្រូនិកផ្ទាល់ខ្លួនរបស់នាយក FBI លោក Kash Patel ដោយបានផ្សព្វផ្សាយរូបថតរបស់លោក និងឯកសារផ្សេងទៀតនៅលើបណ្តាញអ៊ីនធឺណិត។

នៅលើគេហទំព័រ ក្រុមក្រុមចោរព័ត៌មានវិទ្យា Handala Hack Team បាននិយាយថា លោក Patel «បច្ចុប្បន្ននេះនឹងឃើញឈ្មោះរបស់លោកក្នុងចំណោមបញ្ជីជនរងគ្រោះដែលត្រូវបានលួចចូលមើលឯកសារដោយជោគជ័យ»។ ក្រុមចោរព័ត៌មានវិទ្យា បានចេញផ្សាយរូបថតផ្ទាល់ខ្លួនមួយចំនួនរបស់ លោក Patel កំពុងហិតក្លិន និងជក់ស៊ីហ្គា។

អង្គភាព FBI បានបញ្ជាក់ថា សារអេឡិចត្រូនិករបស់ លោក Patel ត្រូវបានគេកំណត់គោលដៅ។ នៅក្នុងសេចក្តីថ្លែងការណ៍មួយ អ្នកនាំពាក្យការិយាល័យ លោក Ben Williamson បាននិយាយថា «យើងបានចាត់វិធានការចាំបាច់ទាំងអស់ដើម្បីកាត់បន្ថយហានិភ័យដែលអាចកើតមានទាក់ទងនឹងសកម្មភាពបែបនេះ» ហើយទិន្នន័យដែលពាក់ព័ន្ធ «មានលក្ខណៈប្រវត្តិសាស្ត្រ និងមិនពាក់ព័ន្ធព័ត៌មានរបស់រដ្ឋាភិបាល ទេ»។ ក្រុម Handala ដែលបង្ហាញខ្លួនជាក្រុមចោរព័ត៌មានវិទ្យា តាំងខ្លួនគាំទ្រប៉ាឡេស្ទីន ត្រូវបានអ្នកស្រាវជ្រាវលោកខាងលិចចាត់ទុកថាជាក្រុមមួយក្នុងចំណោមក្រុមជាច្រើនដែលត្រូវបានប្រើប្រាស់ដោយអង្គភាពចារកម្មតាមអ៊ីនធឺណិតរបស់រដ្ឋាភិបាលអ៊ីរ៉ង់។ ថ្មីៗនេះ ក្រុម Handala បានអះអាងពីការលួចចូលប្រព័ន្ធទិន្ន័យរបស់ក្រុមហ៊ុនផ្តល់សេវាឧបករណ៍វេជ្ជសាស្ត្រនិងសេវាកម្ម Stryker មានមូលដ្ឋាននៅរដ្ឋ Michigan កាលពីថ្ងៃទី១១ ខែមីនា ដោយនិយាយថាពួកគេបានលុបទិន្នន័យក្រុមហ៊ុនយ៉ាងច្រើនសន្ធឹកសន្ធាប់។