ក្រុមហ៊ូទី ដែលគាំទ្រដោយអ៊ីរ៉ង់នៅក្នុងប្រទេសយេម៉ែនបាននិយាយថា ពួកគេត្រៀមខ្លួនរួចជាស្រេចដើម្បីធ្វើអន្តរាគមន៍ដោយ «យោធា» ប្រសិនបើប្រទេសនានាចូលរួមជាមួយសហរដ្ឋអាមេរិក និងអ៊ីស្រាអែល ក្នុងសង្គ្រាមរបស់ពួកគេប្រឆាំងនឹងអ៊ីរ៉ង់ ឬប្រសិនបើសមុទ្រក្រហម ត្រូវបានប្រើប្រាស់ដើម្បីបើកការវាយប្រហារលើសម្ព័ន្ធមិត្តរបស់ពួកគេ។

អ្នកនាំពាក្យយោធារបស់ក្រុម លោក Yahya Saree បាននិយាយនៅក្នុងសុន្ទរកថាតាមទូរទស្សន៍កាលពីថ្ងៃសុក្រថា «យើងបញ្ជាក់ថា យើងត្រៀមប្រយុទ្ធសម្រាប់អន្តរាគមន៍យោធាដោយផ្ទាល់» ប្រសិនបើសម្ព័ន្ធមិត្តថ្មីណាមួយចូលរួមជាមួយទីក្រុងវ៉ាស៊ីនតោននិងអ៊ីស្រាអែល ប្រឆាំងអ៊ីរ៉ង់ និងសម្ព័ន្ធមិត្តរបស់ខ្លួន ឬប្រសិនបើសមុទ្រក្រហមត្រូវបានប្រើប្រាស់សម្រាប់ «ប្រតិបត្តិការអរិភាព» ប្រឆាំងអ៊ីរ៉ង់។

លោក Saree បាននិយាយថា ក្រុមហ៊ូទី បានត្រៀមខ្លួនរួចជាស្រេចដើម្បីធ្វើសកម្មភាព ប្រសិនបើអ្វីដែលលោកហៅថាជាការកើនឡើងប្រឆាំងអ៊ីរ៉ង់នៅតែបន្ត ប៉ុន្តែមិនបាននិយាយថា អន្តរាគមន៍ណាមួយនឹងធ្វើឡើងក្នុងទម្រង់បែបណានោះទេ។

ការព្រមាននេះ បង្កើនការរំពឹងទុកនៃសង្គ្រាមក្នុងតំបន់កាន់តែទូលំទូលាយ ជាពិសេសដោយសារតែសមត្ថភាពរបស់ក្រុមហ៊ូទី អាចវាយប្រហារគោលដៅឆ្ងាយហួសពីប្រទេសយេម៉ែន និងរំខានដល់ផ្លូវដឹកជញ្ជូនជុំវិញឧបទ្វីបអារ៉ាប់។ ក្រុមឧទ្ទាមយេម៉ែនមួយនេះ បានគ្រប់គ្រងរដ្ឋធានីសាណា និងនៅភាគពាយ័ព្យប្រទេសចាប់តាំងពីឆ្នាំ ២០១៤។ បន្ទាប់ពីអ៊ីស្រាអែល បានចាប់ផ្តើមសង្គ្រាមប្រល័យពូជសាសន៍របស់ខ្លួននៅតំបន់ហ្កាហ្សាក្នុងខែតុលា ឆ្នាំ ២០២៣ ក្រុមហ៊ូទីបានកំណត់គោលដៅលើនាវានៅសមុទ្រក្រហម និងបានធ្វើការវាយប្រហារដោយយានដ្រូន និងមីស៊ីលប្រឆាំងអ៊ីស្រាអែល ដោយនិយាយថាពួកគេកំពុងធ្វើសកម្មភាពក្នុងសាមគ្គីភាពជាមួយប្រជាជនប៉ាឡេស្ទីនដែលរងការបាញ់ប្រហារនៅតំបន់ហ្កាហ្សា។