​សហរដ្ឋអាមេរិក៖ កម្មវិធី​ប្រគល់​ពានរង្វាន់ Oscars បាន​និយាយ​ថា តារា​ចម្រៀង តារាភាពយន្ត និង​ជា​ផលិតករ​ភាពយន្ត​របស់​សហរដ្ឋ​អាមេរិក​លោក Will Smith ត្រូវ​បាន​ស្នើ​ឲ្យ​ចាក​ចេញពី​ពិធី​ប្រគល់​ពានរង្វាន់ Oscars ក្រោយ​លោក​ឡើង​ទៅ​ទះកំផ្លៀង​តារា​កំប្លែង​អាមេរិក​លោក Chris Rock ដល់​លើ​ឆាក ប៉ុន្តែ​លោក​មិន​ព្រម​ចាកចេញ​ឡើយ​។

​ស្ថាប័ន​នេះ​ក៏​និយាយ​ផង​ដែរ​ថា ខ្លួន​បាន​ផ្ដួចផ្ដើម "​ដំណើរការ​នីតិវិធី​" ទល់នឹង​លោក Smith​។ ​លោក Smith បាន​ទះកំផ្លៀង​លោក Rock បន្ទាប់ពី​តារា​កំប្លែង​រូប​នេះ​និយាយ​លេង​សើច​បែប​ចំអក​ ឲ្យ​សក់​ក្បាល​របស់​ភរិយា​របស់​លោក​គឺ​លោកស្រី Jada Pinkett Smith ដោយសារ​តែ​មាន​ជំងឺ​ជ្រុះ​សក់​។ ​ក្រោយមក​លោក Will Smith បាន​សូមអភ័យទោស​ចំពោះ​តារា​កំប្លែង និង​ជា​ផលិតករ​ភាពយន្ត​អាមេរិក​ស្បែក​ខ្មៅ​លោក Chris Rock ដោយ​និយាយ​ថា ឥរិយាបថ​របស់​លោក​មិន​អាច​ទទួល​យក​បាន និង​ជា​កំហុស​ឆ្គង​មិន​អាច​ប្រកែក​បាន​។

លោក​បាន​និយាយ​នៅ​ក្នុង​សេចក្ដីថ្លែងការណ៍​មួយ​របស់​លោក​ថា លោក​បាន​សូម​អភ័យទោស​ជា​សាធារណៈ​ចំពោះ​អ្នក Chris។ ​ដោយ​លោក​លើក​ឡើង​ថា ​ពេលនោះ​ខ្ញុំ​មាន​អារម្មណ៍​ច្រឡោត​ខ្លាំង​ពេក ​ខ្ញុំ​ដឹង​ខុស​ហើយ​។ ​នៅ​ក្នុង​សេចក្ដីថ្លែងការណ៍​មួយ​ស្ថាប័ន​នេះ​បាន​និយាយ​ថា ​លោក Smith ត្រូវ​បាន​ស្នើ​ឲ្យ​ចាក​ចេញពី​កម្មវិធី តែ​លោក​មិន​ព្រម​ចាក​ចេញ ប៉ុន្តែ​យើង​បាន​ទទួល​ស្គាល់​ថា យើង​អាច​ដោះស្រាយ​ស្ថានភាព​នេះ​បាន​។ ​ស្ថាប័ន​នេះ​បាន​ប្រកាស​ថា ខ្លួន​បាន​ផ្ដួចផ្ដើម "​ដំណើរការ​នីតិវិធី​" ​ទល់នឹង​លោក Smith ពី​បទ​បំពាន​ច្បាប់​បទដ្ឋាន​របស់​កម្មវិធី​ប្រគល់​ពានរង្វាន់ Oscars៕

អត្ថបទ៖ សុខមាន