រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ ( Sergei Lavrov) កាលពីថ្ងៃសុក្រ បានពិភាក្សាអំពីលទ្ធភាពនៃការដោះស្រាយការទូតក្នុងសង្គ្រាមអ៊ីរ៉ង់ជាមួយសមភាគីអ៊ីរ៉ង់របស់លោក គឺលោក Abbas Araghchi។ នេះបើយោងតាមក្រសួងរបស់លោក ឡាវរ៉ូវ។

សេចក្តីថ្លែងការណ៍នៅលើគេហទំព័ររបស់ក្រសួងបានឲ្យដឹងថា៖«រដ្ឋមន្ត្រីទាំងពីរ បានពិភាក្សាលម្អិតអំពីវិបត្តិយោធា-នយោបាយដ៏លំបាកបំផុតនៅមជ្ឈិមបូព៌ា ដែលបានផ្ទុះឡើង ដោយសារការឈ្លានពានដែលមិនបានបង្កហេតុរបស់អាមេរិកនិងអ៊ីស្រាអែលប្រឆាំងនឹងអ៊ីរ៉ង់»។

“មានការផ្លាស់ប្តូរទស្សនៈអំពីទស្សនវិស័យនៃការផ្លាស់ប្តូរជម្លោះទៅជាបណ្តាញសម្រាប់ការដោះស្រាយនយោបាយ-ការទូតដោយផ្អែកលើច្បាប់អន្តរជាតិ និងគិតគូរពីផលប្រយោជន៍ស្របច្បាប់របស់ប្រទេសទាំងអស់ នៅក្នុងតំបន់នេះ»។

សេចក្តីថ្លែងការណ៍នេះ ក៏បានបញ្ជាក់ផងដែរថា លោក ឡាវរ៉ូវ បានគូសបញ្ជាក់ពីព័ត៌មានលម្អិតនៃការដឹកជញ្ជូនជំនួយមនុស្សធម៌ថ្មីៗបំផុតរបស់រុស្ស៊ី ទៅកាន់អ៊ីរ៉ង់។

ប្រទេសរុស្ស៊ី និងអ៊ីរ៉ង់ បានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រដែលគ្របដណ្តប់លើកិច្ចសហប្រតិបត្តិការនយោបាយ សេដ្ឋកិច្ច យោធា និងថាមពល ប៉ុន្តែវាមិនបានបញ្ចូលកិច្ចព្រមព្រៀងការពារគ្នាទៅវិញទៅមកនោះទេ៕