ប្រធានាធិបតីអាមេរិក ដូណាល់ ត្រាំ កាលពីថ្ងៃសុក្រ បានទទូចថា អ៊ីរ៉ង់ត្រូវតែបើកច្រកសមុទ្រហ័រមូស សម្រាប់ចរាចរណ៍ប្រេង ដើម្បីធ្វើកិច្ចព្រមព្រៀងសន្តិភាព។

ដោយនិយាយឡើងវិញនូវការអះអាងរបស់លោកថា ទីក្រុងតេអេរ៉ង់បានត្រៀមខ្លួនរួចជាស្រេច ដើម្បីធ្វើកិច្ចព្រមព្រៀង ទោះបីជាមានការបដិសេធក៏ដោយ មេដឹកនាំអាមេរិករូបនេះ បាននិយាយថា ការចរចាកំពុងដំណើរការ ដើម្បីបញ្ចប់ជម្លោះរយៈពេលមួយខែនេះ។

លោក ត្រាំ បានបន្ថែមថា អ៊ីរ៉ង់កំពុង «រត់គេចខ្លួន» ហើយបានបញ្ជាក់ជាថ្មីនូវការអះអាងថា ថ្នាក់ដឹកនាំ កងទ័ពជើងទឹក កងទ័ពអាកាស និងកម្មវិធីនុយក្លេអ៊ែររបស់ទីក្រុងតេអេរ៉ង់ សុទ្ធតែរងការខូចខាតយ៉ាងធ្ងន់ធ្ងរ។

លោក ត្រាំ បានប្រាប់វេទិកាវិនិយោគ FII Priority ដែលគាំទ្រដោយអារ៉ាប៊ីសាអ៊ូឌីត នៅទីក្រុង Miami. ថា៖ «យើងកំពុងចរចាឥឡូវនេះ ហើយវានឹងល្អណាស់ ប្រសិនបើយើងអាចធ្វើអ្វីមួយបាន ប៉ុន្តែពួកគេត្រូវតែបើកច្រកនេះឡើងឡើង»។

លោកប្រធានាធិបតីអាមេរិក ក៏បានសរសើរព្រះអង្គម្ចាស់រាជទាយាទអារ៉ាប៊ីសាអ៊ូឌីត Mohammed bin Salman ក៏ដូចជាមេដឹកនាំឈូងសមុទ្រដទៃទៀតមកពី អេមីរ៉ាតអារ៉ាប់រួម កាតា និងបារ៉ែន ចំពោះកិច្ចខិតខំប្រឹងប្រែងរបស់ពួកគេ ក្នុងការសម្រេចបាននូវស្ថិរភាពក្នុងតំបន់៕