ភ្នំពេញ៖ ភាគីប្រទេសហ្គាបុង បានបង្ហើបពីគោលបំណង នៃការចង់បង្កើតMOU ស្តីពីកិច្ចសហប្រតិបត្តិការពាណិជ្ជកម្មកម្ពុជា-ហ្គាបុង ដើម្បីសម្រួលដល់កិច្ចសហប្រតិបត្តិការសេដ្ឋកិច្ច និងពាណិជ្ជកម្ម ខណៈទំហំពាណិជ្ជកម្ម រវាងប្រទេសទាំងពីរ គិតក្នុងរយៈពេល ៤ឆ្នាំកន្លងទៅនេះ សម្រេចបានចំនួនប្រមាណ ១៤៩លានដុល្លារអាម៉េរិក។

នៅក្រោយជំនួបការងារ រវាងឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា និងឯកឧត្តម វីត ហ្វើរណែម ម៉ែនហ្វមប៊ី (Yves Fernand Manfoumbi) រដ្ឋមន្ត្រីក្រសួងពាណិជ្ជកម្មប្រទេសហ្គាបុង កាលពីល្ងាចថ្ងៃទី៣០ មីនា ម្សិលមិញនេះ ក្រសួងពាណិជ្ជកម្ម បានឲ្យដឹងថា ពីមួយឆ្នាំទៅមួយឆ្នាំ ទំហំពាណិជ្ជកម្មរបស់ប្រទេសទាំងពីបានកើនឡើងបន្តបន្ទាប់ ដោយគិតត្រឹមឆ្នាំ២០២១ កន្លងទៅ ទំហំពាណិជ្ជកម្មទ្វេភាគីមានតម្លៃប្រហែល ៤៥លានដុល្លារ ប្រៀបធៀបនឹងឆ្នាំ២០២០ មានតម្លៃ ៤៣លានដុល្លារក្នុងឆ្នាំ២០២០។ ក្នុងនោះ ការនាំចេញពីកម្ពុជាមានតម្លៃ ៤៤,៧៥លានដុល្លា និងកម្ពុជានាំចូលមានចំនួន ០,០២លានដុល្លារ។

ក្នុងជំនួបនោះ ភាគីហ្គាបុង បានជម្រាបជូនឯកឧត្តមរដ្ឋមន្រ្តីថា ហ្គាបុងកំពុងស្វែងរកប្រទេសដៃ​គូ​ពាណិជ្ជកម្ម​បន្ថែមនៅតំបន់អាស៊ី ​ជាពិសេសនៅកម្ពុជា និងបានស្នើភាគីទាំងពីរពង្រីកកិច្ច​សហប្រតិបត្តិការ​លើវិស័យដែលផ្តល់ប្រយោជន៍ទៅវិញទៅមក ​រួមមាន៖ ការបង្កើតMOU ស្តីពី​កិច្ចសហប្រតិបត្តិការពាណិជ្ជកម្ម​កម្ពុជា-ហ្គាបុង ​ដើម្បីសម្រួលដល់កិច្ចសហប្រតិបត្តិការសេដ្ឋកិច្ច​និង​ពាណិជ្ជកម្មក្នុងការអនុវត្តក្របខណ្ឌគម្រោងនានា, ​ជំរុញការវិនិយោគផ្នែកឧស្សាហកម្ម និងការ​ដោះដូរ​ពាណិជ្ជកម្មទ្វេភាគី ​ដែល​មានលក្ខណៈបំពេញបន្ថែម និងការរៀបចំ​ពិព័រណ៍​ពាណិជ្ជកម្ម​ជាដើម។

ភាគីហ្គាបុង ក៏បានជម្រាបជូនអំពីការអនុវត្តប្រព័ន្ធបញ្ជរតែមួយជាតិ ដែលជួយសម្រួលច្រើនដល់​សកម្មភាព​ធុរកិច្ច​នៅហ្គាបុង ​និងចង់​ទទួល​បានការចែករំលែកបទបពិសោធន៍កម្ពុជា​នា​ពេលកន្លងមក។

ជាកិច្ចឆ្លើយតប ឯកឧត្តមរដ្ឋមន្រ្តី ប៉ាន សូរស័ក្តិ បានស្វាគមន៍ និងគាំទ្រលើគ្រប់សំណើដែលបាន​ដាក់​ជូន ​និងជាពិសេសគាំទ្រឱ្យមានការបង្កើត MOU ស្តីពីកិច្ចសហប្រតិបត្តិការពាណិជ្ជកម្មរវាង​កម្ពុជា-ហ្គាបុង ​ដែល​រំពឹងថា ​ភាគីទាំងពីរ​នឹង​ពន្លឿននីតិវិធី​ និង​ពិនិត្យ​បញ្ចប់​សេចក្តីព្រាងMOU នេះឲ្យបានឆាប់រហ័ស ដើម្បីអាចធ្វើការចុះហត្ថលេខាបាន ​នៅអំឡុងឆមាសទី២ ឆ្នាំ២០២២នេះ។ស្របគ្នានេះដែរ ឯកឧត្តមបានជម្រាបជូនថា កម្ពុជាកំពុងធ្វើកំណែទម្រង់ប្រព័ន្ធបញ្ជរតែមួយជាតិ សំដៅជួយសម្រួលសកម្មភាពធុរកិច្ច ​និងស្នើដាក់បញ្ចូលវិស័យនេះ ក្នុងកិច្ចសហប្រតិបត្តិការ​រវាង​កម្ពុជា-ហ្គាបុងនាពេលខាងមុខ ​និងបានស្នើភាគីហ្គាបុងឱ្យពិចារណានាំចូល​ទំនិញ​សក្តានុពល​កម្ពុជា​បន្ថែមពីអង្ករ ដែលរួមមានជា​អាទ៍​ ផ្លែឈើស្រស់ ​ដំឡូងមី ​សំលៀកបំពាក់​ ស្បែកជើង និងកាបូបធ្វើដំណើរ ។ល។

ប្រភពខាងលើ បានបញ្ជាក់ទៀតថា នៅមុនបញ្ចប់ជំនួបនាឱកាសនោះ ឯកឧត្តម ប៉ាន សូរស័ក្តិ បានជម្រាបជូនពីការត្រៀមខ្លួនជាស្រេចដើម្បីស្វាគមន៍​និងសម្របសម្រួលដល់អ្នកវិនិយោគ និង​សកម្មភាពពាណិជ្ជកម្មរបស់ភាគីហ្គាបុង​ នៅប្រទេសកម្ពុជា ​និងលើកទឹកចិត្តដល់ក្រុមបណ្តាប្រទេស​ក្របខ័ណ្ឌតំបន់​ដែលនិយាយភាសាបារាំង​ ក៏ដូចជាក្រុមហ៊ុនមកពីហ្គាបុង ​និងក្រុមហ៊ុនកម្ពុជា ពិនិត្យលទ្ធភាពក្នុងភាពជាដៃគូក្នុងវិស័យធុរកិច្ច ​រវាងក្រុមហ៊ុនផ្សេងៗគ្នានៃភាគីទាំងពីរ៕ អត្ថបទ៖ បូរ៉ាវី