កងកម្លាំងឆ្មាំបដិវត្តន៍អ៊ីរ៉ង់នៅថ្ងៃអាទិត្យ ២៩មីនានេះ បានគំរាមវាយប្រហារសាកលវិទ្យាល័យទាំងឡាយរបស់សហរដ្ឋអាមេរិកនៅមជ្ឈិមបូព៌ាបន្ទាប់ពីនិយាយថាការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែល បានបំផ្លាញសាកលវិទ្យាល័យអ៊ីរ៉ង់ចំនួនពីរ។

សេចក្តីថ្លែងការណ៍ដែលបានចេញផ្សាយដោយប្រព័ន្ធផ្សព្វផ្សាយអ៊ីរ៉ង់បាននិយាយថា ប្រសិនបើរដ្ឋាភិបាលអាមេរិកចង់ឱ្យសាកលវិទ្យាល័យរបស់ខ្លួននៅក្នុងតំបន់នេះរួចផុតពីការសងសឹក ខ្លួនត្រូវតែថ្កោលទោសការទម្លាក់គ្រាប់បែកលើសាកលវិទ្យាល័យរបស់អ៊ីរ៉ង់នៅក្នុងសេចក្តីថ្លែងការណ៍ផ្លូវការមួយត្រឹមម៉ោង១២ ថ្ងៃត្រង់ថ្ងៃចន្ទ ទី៣០ ខែមីនា ម៉ោងនៅទីក្រុងតេអេរ៉ង់។

សេចក្តីថ្លែងការណ៍នេះបានបន្ថែមថា អ៊ីរ៉ង់ណែនាំបុគ្គលិក សាស្ត្រាចារ្យ និងនិស្សិតទាំងអស់នៃបណ្ដាសាកលវិទ្យាល័យអាមេរិកនៅក្នុងតំបន់ និងអ្នកស្រុករស់នៅតំបន់ជុំវិញរបស់សាកលវិទ្យាល័យនានា ឱ្យនៅចម្ងាយមួយគីឡូម៉ែត្រពីបរិវេណសាកលវិទ្យាល័យទាំងនោះ។

សាកលវិទ្យាល័យអាមេរិកជាច្រើនស្ថិតនៅពាសពេញតំបន់ឈូងសមុទ្រ ដូចជាសាកលវិទ្យាល័យ Texas A&M ក្នុងប្រទេសកាតា និងសាកលវិទ្យាល័យ New York University នៅអារ៉ាប់រួមជាដើម។

យោងតាមរបាយការណ៍ប្រព័ន្ធផ្សព្វផ្សាយ ការវាយប្រហារពេញមួយយប់ថ្ងៃសុក្រដល់ថ្ងៃសៅរ៍បានប៉ះចំទីក្រុងតេអេរ៉ង់ រួមទាំងសាកលវិទ្យាល័យវិទ្យាសាស្ត្រ និងបច្ចេកវិទ្យានៅភាគឦសាននៃរដ្ឋធានី ដោយបានបំផ្លាញអគារជាច្រើន ប៉ុន្តែពុំបណ្តាលឱ្យមានអ្នកស្លាប់ និងរបួសនោះទេ ៕