រដ្ឋមន្ត្រីការបរទេសមកពីប្រទេសប៉ាគីស្ថាន អារ៉ាប៊ីសាអ៊ូឌីត អេហ្ស៊ីប និងទួរគី បានជួបប្រជុំគ្នាកាលពីថ្ងៃអាទិត្យ២៩ មីនា ដើម្បីពិភាក្សាអំពីសង្គ្រាមនៅមជ្ឈិមបូព៌ា ដោយទីក្រុងអ៊ីស្លាម៉ាបាដ(Islamabad )ដើរតួជាអ្នកសម្របសម្រួលសម្រាប់សហរដ្ឋអាមេរិក និងអ៊ីរ៉ង់។ 

ក្រសួងការបរទេសប៉ាគីស្ថានបាននិយាយនៅក្នុងសេចក្តីថ្លែងការណ៍ខ្លីមួយថា កិច្ចប្រជុំបួនភាគីរវាងអ្នកការទូតជាន់ខ្ពស់នៃប្រទេសមូស្លីមបានកោះប្រជុំ ដើម្បីពិនិត្យឡើងវិញនូវស្ថានភាពក្នុងតំបន់ដែលកំពុងវិវត្ត និងពិភាក្សាអំពីបញ្ហាផ្ដល់ផលប្រយោជន៍ឲ្យគ្នាទៅវិញទៅមក។

លោក Badr Abdelatty រដ្ឋមន្ត្រីការបរទេសរបស់ប្រទេសអេហ្ស៊ីប និងលោក Hakan Fidan រដ្ឋមន្ត្រីការបរទេសរបស់ប្រទេសទួរគី បានទៅដល់ទីក្រុងអ៊ីស្លាម៉ាបាដកាលពីយប់ថ្ងៃសៅរ៍ ខណៈសមភាគីអារ៉ាប៊ីសាអ៊ូឌីតរបស់ពួកលោក គឺលោក Faisal bin Farhan បានទៅដល់កាលពីរសៀលថ្ងៃអាទិត្យ។

ប្រភពមួយពីក្រសួងការបរទេសបាននិយាយថា អ៊ីរ៉ង់ សហរដ្ឋអាមេរិក និងអ៊ីស្រាអែលមិនត្រូវបានបញ្ជូនតំណាងចូលរួមទេ។

មុនកិច្ចប្រជុំ រដ្ឋមន្ត្រីការបរទេសប៉ាគីស្ថាន លោក Ishaq Dar បានរៀបចំកិច្ចពិភាក្សាទ្វេភាគីដាច់ដោយឡែកជាមួយសមភាគីរបស់លោក។ លោក Fidan និងលោក Abdelatty ក៏បានជួបជាមួយមេបញ្ជាការកងទ័ពដ៏មានឥទ្ធិពលរបស់ប៉ាគីស្ថាន គឺលោក Field Marshal Asim Munir ផងដែរ។

រដ្ឋាភិបាលនៅប៉ាគីស្ថានបានក្លាយជាអ្នកសម្របសម្រួលដ៏សំខាន់រវាងអ៊ីរ៉ង់ និងសហរដ្ឋអាមេរិក ខណៈសង្គ្រាមកំពុងអូសបន្លាយ ដោយបម្រើការជាអន្តរការីសម្រាប់នាំសាររវាងភាគីទាំងពីរ។

ប្រធានសភារបស់អ៊ីរ៉ង់ លោក Baqer Qalibaf កាលពីថ្ងៃអាទិត្យដែរ បានចោទប្រកាន់អាមេរិក ពីបទបញ្ជូនសារអំពីលទ្ធភាពនៃការចរចា តែរៀបចំផែនការវាយប្រហារថ្មើរជើង ដោយបន្ថែមថា ទីក្រុងតេអេរ៉ង់ បានត្រៀមរួចហើយដើម្បីឆ្លើយតប បើអាមេរិកបញ្ជូនកងទ័ពចូលវាយលុកអ៊ីរ៉ង់៕