នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃអាទិត្យ (២៩ មីនា) ថា លោកបានបញ្ជាឱ្យយោធាអ៊ីស្រាអែលពង្រីកប្រតិបត្តិការរបស់ខ្លួនបន្ថែមទៀតនៅភាគខាងត្បូងប្រទេសលីបង់ ដោយលើកឡើងពីការបាញ់រ៉ូកែតជាបន្តបន្ទាប់ដោយក្រុមសកម្មប្រយុទ្ធហេសបូឡា។

ក្រុមហេសបូឡាដែលគាំទ្រដោយអ៊ីរ៉ង់ ចាប់ផ្តើមបាញ់រ៉ូកែតចូលទៅអ៊ីស្រាអែល បន្ទាប់ពីអាមេរិក និងអ៊ីស្រាអែល បានបើកការវាយប្រហារតាមអាកាសលើអ៊ីរ៉ង់។ យុទ្ធជនជាង ៤០០នាក់ មកពីក្រុមហេសបូឡា ត្រូវបានសម្លាប់ ចាប់តាំងពីក្រុមប្រដាប់អាវុធលីបង់មួយនេះ បើកការបាញ់ប្រហារលើកដំបូងក្នុងសង្គ្រាមថ្មីជាមួយអ៊ីស្រាអែលនៅថ្ងៃទី២ ខែមីនា នេះបើតាមប្រភពពីក្រុមហេសបូឡា បានប្រាប់សារព័ត៌មានរ៉យទ័រ។

អ៊ីស្រាអែលបាននិយាយកាលពីសប្តាហ៍មុនថា ខ្លួនកំពុងពង្រីក «តំបន់ទ្រនាប់» រហូតដល់ទន្លេលីតានី ប៉ុន្តែគេមិនច្បាស់ភ្លាមៗឡើយថា តើលោក Netanyahu កំពុងសំដៅលើតំបន់នោះ ឬក៏ជាប្រតិបត្តិការរឹបអូសយកទឹកដីថ្មីបន្ថែមទៀតនោះទេ។ ថ្លែងក្នុងសេចក្តីថ្លែងការណ៍វីដេអូមួយពីបញ្ជាការដ្ឋានភាគខាងជើងអ៊ីស្រាអែល លោក Netanyahu បាននិយាយថា «ឥឡូវនេះ លោកណែនាំឱ្យពង្រីកតំបន់សន្តិសុខដែលមានស្រាប់បន្ថែមទៀត ដើម្បីទប់ស្កាត់ការគំរាមកំហែងនៃការឈ្លានពាន និងដើម្បីរុញច្រានការបាញ់មីស៊ីលប្រឆាំងរថក្រោះចេញពីព្រំដែនរបស់អ៊ីស្រាអែល»។

កាលពីសប្តាហ៍មុន រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បាននិយាយថា កងកម្លាំងអ៊ីស្រាអែលនឹង «គ្រប់គ្រងស្ពាននានាដែលនៅសេសសល់ និងតំបន់សន្តិសុខរហូតដល់ទន្លេលីតានី» ជាទន្លេមួយដែលប្រសព្វនឹងសមុទ្រមេឌីទែរ៉ាណេ ចម្ងាយប្រហែល ៣០ គីឡូម៉ែត្រ ភាគខាងជើងនៃព្រំដែនអ៊ីស្រាអែល៕