យោធា និងឆ្មាំល្បាតឆ្នេររបស់ទីក្រុងប៉េកាំង បាននិយាយថា ប្រទេសចិន បានធ្វើប្រតិបត្តិការល្បាតកងទ័ពជើងទឹក កងទ័ពអាកាស និងឆ្មាំល្បាតឆ្នេរ នៅជុំវិញតំបន់ថ្មប៉ប្រះទឹក Scarborough Shoal ក្នុងសមុទ្រចិនខាងត្បូងដែលមានជម្លោះ កាលពីថ្ងៃអាទិត្យ (២៩ មីនា)។ តំបន់ថ្មប៉ប្រះទឹកនេះស្ថិតនៅក្នុងតំបន់សេដ្ឋកិច្ចផ្តាច់មុខរបស់ហ្វីលីពីន ប៉ុន្តែចិនក៏អះអាងសិទ្ធថា ដែនទឹកនេះជាផ្នែកមួយនៃទឹកដីរបស់ខ្លួនផងដែរ។

បញ្ជាការដ្ឋានភាគខាងត្បូងនៃយោធាចិន បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា «ការល្បាតបែបនេះបម្រើជាវិធានការតបតដ៏មានប្រសិទ្ធភាពមួយ ដើម្បីទប់ទល់នឹងការរំលោភសិទ្ធិ និងសកម្មភាពញុះញង់គ្រប់ប្រភេទ»។

ការល្បាតទាំងនេះបានកើតឡើងបន្ទាប់ពីទីក្រុងប៉េកាំង និងទីក្រុងម៉ានីល បានចាប់ផ្តើមកិច្ចចរចាកម្រិតខ្ពស់ឡើងវិញកាលពីសប្តាហ៍មុន លើដែនទឹកដែលមានជម្លោះ និងបានពិភាក្សាអំពីកិច្ចសហប្រតិបត្តិការប្រេង និងឧស្ម័ននៅក្នុងតំបន់នោះ។ ក្រសួងការបរទេសហ្វីលីពីន បាននិយាយកាលពីថ្ងៃសៅរ៍កន្លងទៅថា កិច្ចពិភាក្សាទាំងនេះក៏ជាការពិភាក្សាទូលំទូលាយលើកដំបូងលើទំនាក់ទំនងទ្វេភាគីចាប់តាំងពីខែមីនា ឆ្នាំ២០២៣ មក ដែលមានគោលបំណងកសាងទំនុកចិត្តក្នុងចំណោមកិច្ចពិភាក្សាផ្សេងៗទៀត។

ការប្រឈមមុខដាក់គ្នាតាមសមុទ្រថ្មីៗនេះបានបង្កើនកម្រិតនៃភាពតានតឹង ដោយទីក្រុងម៉ានីលចោទទីក្រុងប៉េកាំងថាបាន «ធ្វើសមយុទ្ធដ៏គ្រោះថ្នាក់» និងប្រើកាណុងបាញ់ទឹកដើម្បីជ្រៀតជ្រែកដល់បេសកកម្មផ្គត់ផ្គង់សម្ភារៈឡើងវិញរបស់ខ្លួននៅក្នុងតំបន់ដែលមានជម្លោះ៕