ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអាទិត្យ (២៩ មីនា) ថា មេដឹកនាំកូរ៉េខាងជើង លោក គីម ជុងអ៊ុន បានត្រួតពិនិត្យការសាកល្បងម៉ាស៊ីនឥន្ធនៈរឹងដែលបានធ្វើឱ្យប្រសើរឡើង សម្រាប់សព្វាវុធមានសមត្ថភាពបាញ់ទៅដល់ដីគោកសហរដ្ឋអាមេរិក ហើយបានហៅយុទ្ធោបករណ៍នេះថា ជាការអភិវឌ្ឍដ៏សំខាន់មួយ ដែលជំរុញឃ្លាំងអាវុធយុទ្ធសាស្ត្ររបស់កូរ៉េខាងជើង។

ការសាកល្បងនេះស្របនឹងគោលដៅដែលបានបញ្ជាក់របស់លោក គីម ក្នុងការទទួលបានមីស៊ីលដែលរហ័សរហួន និងពិបាកពិនិត្យឃើញជាងមុន ដែលផ្តោតលើសហរដ្ឋអាមេរិក និងសម្ព័ន្ធមិត្តរបស់ខ្លួន ប៉ុន្តែអ្នកជំនាញខ្លះសង្ស័យថា ការអះអាងរបស់កូរ៉េខាងជើងអាចជាការបំផ្លើស។ គួរឱ្យដឹងថា មីស៊ីលដែលមានសារធាតុជំរុញឥន្ធនៈរឹងភ្ជាប់មកស្រាប់ ងាយផ្លាស់ទី និងលាក់បាំងការបាញ់បង្ហោះរបស់ខ្លួន ជាងអាវុធឥន្ធនៈរាវ ដែលជាទូទៅត្រូវតែចាក់ប្រេងមុនពេលបាញ់បង្ហោះ ហើយមិនអាចប្រើបានយូរទេ។

ទីភ្នាក់ងារសារព័ត៌មានរដ្ឋ KCNA រាយការណ៍ថា លោក គីម បានត្រួតពិនិត្យការធ្វើតេស្តម៉ាស៊ីនមីស៊ីលបាញ់ចេញពីដី ដោយប្រើសម្ភារៈសមាសធាតុសរសៃកាបូន។ ទីភ្នាក់ងារនេះនិយាយថា កម្លាំងរុញច្រានអតិបរមារបស់ម៉ាស៊ីននេះគឺ ២.៥០០គីឡូញូតុន ពោលគឺកើនឡើងពីប្រហែល ១.៩៧០គីឡូញូតុន ដែលបានរាយការណ៍នៅក្នុងការធ្វើតេស្តម៉ាស៊ីនឥន្ធនៈរឹងស្រដៀងគ្នានេះកាលពីខែកញ្ញា ឆ្នាំមុន។

KCNA រាយការណ៍ថា ការសាកល្បងនេះ ធ្វើឡើងជាផ្នែកមួយនៃការកសាងឃ្លាំងអាវុធរយៈពេលប្រាំឆ្នាំរបស់ប្រទេសនេះ ដែលមានន័យថា ជាការធ្វើឱ្យប្រសើរឡើងនូវ «មធ្យោបាយវាយប្រហារជាយុទ្ធសាស្ត្រ» ដែលជាឃ្លាសំដៅលើមីស៊ីលបាលីស្ទិកមានសមត្ថភាពនុយក្លេអ៊ែរ និងអាវុធផ្សេងៗទៀត។ យោងតាម KCNA លោក គីម បាននិយាយថា ការធ្វើតេស្តម៉ាស៊ីនចុងក្រោយបង្អស់នេះ «មានសារៈសំខាន់យ៉ាងខ្លាំងក្នុងការដាក់កម្លាំងយោធាយុទ្ធសាស្ត្ររបស់កូរ៉េខាងជើង ឱ្យស្ថិតនៅកម្រិតខ្ពស់បំផុត»៕