ចិនបានអំពាវនាវឱ្យហ្វីលីពីនជួយបង្កើតលក្ខខណ្ឌចាំបាច់ដើម្បីរក្សាស្ថិរភាព និងកែលម្អទំនាក់ទំនងទ្វេភាគី ខណៈក្រុមមន្ត្រីបានបញ្ចប់ការចរចារយៈពេលពីរថ្ងៃលើជម្លោះទឹកដីរបស់ពួកគេនៅសមុទ្រចិនខាងត្បូង។

ក្រសួងការបរទេសចិនបាននិយាយនៅក្នុងសេចក្តីថ្លែងការណ៍មួយថា ក្រុមមន្ត្រីបានធ្វើការផ្លាស់ប្តូរទស្សនៈ ដោយស្មោះត្រង់ និងស៊ីជម្រៅ លើទំនាក់ទំនង និងបញ្ហាអន្តរជាតិ និងតំបន់ ក្នុងការពិភាក្សាការទូតកាលពីថ្ងៃសៅរ៍ ចុងសប្ដាហ៍នេះ នៅទីក្រុង Quanzhou ភាគអាគ្នេយ៍នៃខេត្ត Fujian របស់ចិន។

យោងតាមសេចក្តីថ្លែងការណ៍មួយកាលពីថ្ងៃសៅរ៍ពីក្រសួងការបរទេសរបស់ទីក្រុង ម៉ានីល បានឲ្យដឹងថា ហ្វីលីពីនបាននិយាយថា គណៈប្រតិភូរបស់ខ្លួន បានបញ្ជាក់យ៉ាងម៉ឺងម៉ាត់អំពីជំហរគោលការណ៍របស់ខ្លួន និងបានលើកឡើងពីការព្រួយបារម្ភអំពីឧបទ្ទវហេតុនានាដែលប៉ះពាល់ដល់សុវត្ថិភាពរបស់កងទ័ព និងអ្នកនេសាទហ្វីលីពីន។

ក្រសួងបានបន្ថែមថា ភាគីទាំងពីរបានបន្តធ្វើឱ្យមានវឌ្ឍនភាពលើវិធានការជាក់ស្តែងដែលស្របនឹងច្បាប់ និងគោលនយោបាយហ្វីលីពីន ដើម្បីបង្កើនទំនុកចិត្តលើដែនសមុទ្រ។

ទីក្រុងម៉ានីល និងទីក្រុងប៉េកាំង កំពុងជាប់គាំងក្នុងជម្លោះលើផ្លូវទឹកយុទ្ធសាស្ត្រសមុទ្រចិនខាងត្បូង ហើយលើកចុងក្រោយដែលពួកគេបានធ្វើកិច្ចចរចាជាផ្លូវការលើជម្លោះនេះ គឺនៅក្នុងខែមករា ឆ្នាំមុន។

កិច្ចប្រជុំចុងក្រោយបំផុតនេះ បានកើតឡើងបន្ទាប់ពីប្រធានាធិបតីហ្វីលីពីនលោក Ferdinand Marcos Jr បានបង្ហាញពីការបើកចំហចំពោះការចាប់ផ្តើមកិច្ចចរចាឡើងវិញជាមួយទីក្រុងប៉េកាំងលើគម្រោងប្រេង និងឧស្ម័នរួមគ្នានៅក្នុងតំបន់មានជម្លោះនៃសមុទ្រចិនខាងត្បូង។ ទីក្រុងម៉ានីលក៏កំពុងស្វែងរកប្រេង និងជីពីទីក្រុងប៉េកាំងផងដែរ  បន្ទាប់ពីសង្គ្រាមអ៊ីរ៉ង់បានរំខានដល់ការផ្គត់ផ្គង់៕