អាជ្ញាធរបាននិយាយកាលពីថ្ងៃអាទិត្យ (២៩ មីនា) ថា ទឹកជំនន់យ៉ាងធ្ងន់ធ្ងរ គ្រោះបំណាក់ដី និងផ្គររន្ទះនៅតំបន់ខ្លះនៃប្រទេសអាហ្វហ្គានីស្ថាន បានសម្លាប់មនុស្សយ៉ាងតិច ១៧នាក់ និងប្រមាណជិត ៣០នាក់បានរងរបួស ក្នុងពេល ២៤ម៉ោងកន្លងទៅនោះ ជាមួយនឹងការព្យាករថានឹងមានភ្លៀងធ្លាក់ខ្លាំងបន្ថែមទៀត។ ទាំងនេះគឺជាការស្លាប់ចុងក្រោយបំផុតពីអាកាសធាតុអាក្រក់នៅអាហ្វហ្គានីស្ថានក្នុងរដូវកាលនេះ ស្របពេលវិបត្តិមនុស្សធម៌នៅតែមានភាពធ្ងន់ធ្ងរយ៉ាងខ្លាំង។

លោក Yousuf Hammad អ្នកនាំពាក្យរបស់អាជ្ញាធរ បាននិយាយក្នុងសេចក្តីថ្លែងការណ៍មួយថា ចំនួនអ្នកស្លាប់ និងរបួសអាចកើនឡើង ខណៈក្រុមការងារមកពីអាជ្ញាធរគ្រប់គ្រងគ្រោះមហន្តរាយជាតិ បន្តពិនិត្យមើលតំបន់ដែលរងផលប៉ះពាល់។ ខេត្តចំនួន១៣ ក្នុងចំណោមខេត្តទាំង ៣៤ របស់អាហ្វហ្គានីស្ថាន បានរងការបំផ្លិចបំផ្លាញ ដោយប្រជាជនសរុបចំនួន ៥៣០ គ្រួសារបានរងផលប៉ះពាល់។

កាលពីដើមឆ្នាំនេះ ព្រិលធ្លាក់ខ្លាំង និងទឹកជំនន់យ៉ាងគំហុកបានសម្លាប់មនុស្សរាប់សិបនាក់រួចទៅហើយនៅទូទាំងអាហ្វហ្គានីស្ថាន។ ប្រទេសនេះងាយរងគ្រោះខ្លាំងចំពោះព្រឹត្តិការណ៍អាកាសធាតុធ្ងន់ធ្ងរ ដោយមានព្រិលធ្លាក់ និងភ្លៀងធ្លាក់ខ្លាំង ដែលជារឿយៗបានសម្លាប់មនុស្សរាប់សិបនាក់ ឬរាប់រយនាក់ក្នុងពេលតែមួយ។ នៅឆ្នាំ២០២៤ មនុស្សជាង ៣០០នាក់ បានស្លាប់នៅក្នុងទឹកជំនន់យ៉ាងគំហុកនៅនិទាឃរដូវ៕