រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើក​ទឹក​ចិត្ត​ដល់​បង​ប្អូន​ជា​ធុរជន ជាពាណិជ្ជករ ឧស្សាហករ ផលិតករ និងសេវាករទាំងអស់ សូមស្វែងយល់ នឹងចាប់​យក​បញ្ញា​សិប្បនិម្មិត (AI) សម្រាប់ដំណោះស្រាយផ្សេងៗ ជាពិសេស ដំណោះស្រាយ​នៅ​ក្នុង​ការ​ធ្វើ​អាជីវកម្ម បម្រើក្នុងសេដ្ឋកិច្ចនានា។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើក​ឡើង​ក្នុង​សន្និសីទសារព័ត៌មាន ក្នុងថ្ងៃបញ្ចប់ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ នៅ​ថ្ងៃ​ទី​២៨ ខែមីនា ឆ្នាំ២០២៦ថា បញ្ញាសិប្បនិម្មិត (AI) បាននិង កំពុង​លេច​រូប​រាង​ឡើង​នៅ​ក្នុង​សកល​លោក ​ដោយប្រព័ន្ធបច្ចេកវិទ្យានេះមានរចនាសម្ព័ន្ធធំជាងគេ នៅក្នុង​ចំណោម​បច្ចេក​វិទ្យា​ជា​ច្រើន ​ក្នុងបណ្តាប្រទេសនៅលើពិភពលោកទាំងអស់ បាននិងកំពុង​ចាប់​យក​អត្ថ​ប្រយោជន៍​ពី​បញ្ញា​សិប្បនិម្មិត (AI) សម្រាប់ការប្រើប្រាស់នូវ រាល់ប្រតិបត្តិការផ្សេងៗ ដោយចំណេញ​ពេល​វេលា ​និងថវិកាជាដើម។ តែទោះបីយ៉ាងណាវិស័យនេះក៏គុណវិបត្តិ ដែលតម្រូវឱ្យយើង មាន​ការ​ប្រុង​ប្រយ័ត្ន​ខ្ពស់ ដើម្បីចៀសវាងនូវរាល់កំហុសផ្សេងៗក្នុងប្រតិបត្តិការរបស់ខ្លួន។

ឯកឧត្តម​រដ្ឋមន្ត្រី បន្តថា សម្រាប់កម្ពុជានៅក្នុងពន្លារបស់រាជរដ្ឋាភិបាល បានបង្ហាញថា មាន​ក្រសួង​-ស្ថាប័នចំនួន ១៦ បាន និងកំពុងប្រើប្រាស់នូវបញ្ញាសិប្បនិម្មិត (AI) លើការ​ផ្តល់​សេវា​សាធារណៈ​ជូនប្រជាពលរដ្ឋ មកដល់បច្ចុប្បន្នក៏មានក្រសួងស្ថាប័នជា ច្រើនទៀតបានប្រើប្រាស់ AI។ ចំណែកនៅក្នុងគណៈកម្មាធិការសម្របសម្រួលការអភិវឌ្ឍន៍សេដ្ឋកិច្ចក្រៅប្រព័ន្ធ ក៏បាន​ប្រើ​ប្រាស់ ​AI លើការផ្ទៀតផ្ទាត់អត្តសញ្ញាណប័ណ្ណរបស់អ្នកស្នើសុំផងដែរ។ ជុំវិញ AI នេះ ឯកឧត្តម​បាន​លើក​ទឹកចិត្តដល់ក្រសួងស្ថាប័នរដ្ឋ វិស័យ ឯកជន សិស្សានុសិស្ស និងគ្រប់ស្រទាប​វណ្ណៈ​ទាំងអស់​សូមស្វែងយល់ និងសូមប្រើប្រាស់បញ្ញាសិប្បនិម្មិត (AI) សម្រាប់ដំណោះ ស្រាយ​គ្រប់​ផ្នែក ​និងគ្រប់កម្រិត។

ជុំវិញ AI នេះ, លោក Zhao Hongyu អគ្គនាយករងក្រុមហ៊ុន Beijing Electronic Digital Intelligence Technology (BEDI) នៅក្នុងកិច្ចពិភាក្សាក្នុងទិវាជាតិវិទ្យាសាស្ត្រ បច្ចេកវិទ្យា និង​នវានុវត្តន៍លើកទី៤នេះ លោកបានចែករំលែកយុទ្ធសាស្ត្រ និងបទពិសោធន៍ អំពី​ការ​អនុវត្ត​បច្ចេក​វិទ្យា ​AI ដល់មន្រ្តីរាជការ វិស័យឯកជន និងសិស្ស-និស្សិតកម្ពុជា ខណៈ​ដែល​វិស័យ​នេះ​កំពុង​ក្លាយ​ជា​កម្លាំង ចលករជំរុញសេដ្ឋកិច្ចឌីជីថល។ លោកបានបង្ហាញឧទាហរណ៍ថា ក្រុមការងារ​របស់​លោក​បានជួយឱ្យសហគ្រាសក្នុងស្រុកចិន បាន បង្កើតវីដេអូផ្សព្វផ្សាយរាប់ពាន់ពី AI, ហើយ​សម្រាប់ការបង្កើតនេះគឺចំណាយក្នុងរយៈពេលខ្លីបំផុត ដោយបានជួយកាត់បន្ថយ ចំណាយ​ផលិត​កម្ម និងពេលវេលាយ៉ាងច្រើនសន្ធឹកសន្ធាប់ផងដែរ។ ជុំវិញ AI នេះដែរ, លោក Zhao ក៏បាន​ជំរុញឱ្យភាគីពាក់ព័ន្ធ កម្ពុជា ចាប់យកដំណោះស្រាយ AI និងបង្កើនកិច្ច​សហ​ប្រតិបត្តិ​ការ​ស៊ី​ជម្រៅ ​ក្នុងការកសាងពិភពលោកឌីជីថលរួមគ្នា៕ អត្ថបទ៖ សុន រ៉ាឌី