យោងតាមក្រុមគ្រូពេទ្យសង្គ្រោះបឋមបានឲ្យដឹងថា ការវាយប្រហារធ្វើឡើងដោយកងជីវពលយោធាប៉ារ៉ាស៊ូដង់ លើរដ្ឋ South Kordofan បានសម្លាប់មនុស្សយ៉ាងហោចណាស់ ១៤ នាក់ រួមទាំងកុមារ ៥ នាក់ និងស្ត្រី ២ នាក់។

បណ្តាញគ្រូពេទ្យស៊ូដង់និយាយថា កងកម្លាំងគាំទ្ររហ័ស(RSF) និងសម្ព័ន្ធមិត្តរបស់ពួកគេនៅក្នុងចលនាភាគខាងជើងរំដោះប្រជាជនស៊ូដង់ បានបាញ់ផ្លោងលើតំបន់លំនៅឋានក្នុងទីក្រុង Dilling ក្នុងការវាយប្រហារដែលមានរយៈពេលច្រើនម៉ោង បណ្តាលឲ្យមនុស្សយ៉ាងហោចណាស់ ២៣ នាក់ផ្សេងទៀតរងរបួស រួមទាំងកុមារ ៧ នាក់។ យោធា ដែលនៅឆ្នាំនេះបានបំបែកការហ៊ុមព័ទ្ធរបស់កងកម្លាំងគាំទ្ររហ័ស(RSF) លើទីក្រុងដែលបានឃើញការផ្គត់ផ្គង់ត្រូវបានកាត់ផ្តាច់ និងមានការបាញ់ផ្លោងជាញឹកញាប់ បាននិយាយថា ខ្លួនបានទប់ស្កាត់ការវាយប្រហារនៅទីរួមខេត្ត South Kordofan។

ក្រុមគ្រូពេទ្យ បានព្រមានអំពី «សេណារីយ៉ូដ៏មហន្តរាយ» អាចកើតមាន ស្រដៀងទៅនឹងអ្វីដែលបានកើតឡើងនៅក្នុងទីក្រុង el-Fasher តំបន់ Darfur។ កងកម្លាំង RSF បានឈ្លានពានតំបន់នោះក្នុងខែតុលា ក្នុងការវាយប្រហារមួយដែលអ្នកជំនាញចាត់តាំងដោយអង្គការសហប្រជាជាតិបាននិយាយថា «សញ្ញានៃការប្រល័យពូជសាសន៍»។ មនុស្សជាង ៦.០០០ នាក់ត្រូវបានសម្លាប់ក្នុងរយៈពេលបីថ្ងៃនៅទីក្រុង el-Fasher នៅពេលដែលកងកម្លាំង RSF បានចាប់ផ្តើម «រលកនៃអំពើហិង្សាដ៏ខ្លាំងក្លាទាំងទំហំ និងភាពឃោរឃៅ» នេះបើយោងតាមរបាយការណ៍ពីការិយាល័យសិទ្ធិមនុស្សអង្គការសហប្រជាជាតិ។ សង្គ្រាមរវាងកងទ័ពស៊ូដង់ និងកងកម្លាំងគាំទ្ររហ័ស(RSF) បានផ្ទុះឡើងនៅពាក់កណ្តាលខែមេសា ឆ្នាំ ២០២៣ ដោយអំពើហិង្សានាំឱ្យមានវិបត្តិមនុស្សធម៌ ខណៈមនុស្សជាង១២លាននាក់ត្រូវបានបង្ខំឱ្យភៀសខ្លួនចេញពីលំនៅឋានរបស់ពួកគេ ហើយមនុស្សជាង៣៣លាននាក់ត្រូវការជំនួយមនុស្សធម៌។ យោងតាមតួលេខរបស់អង្គការសហប្រជាជាតិបានឲ្យដឹងថា មនុស្សជាង ៤០.០០០ នាក់ត្រូវបានសម្លាប់ក្នុងរយៈពេលបីឆ្នាំកន្លងទៅនេះ ហើយក្រុមជំនួយនិយាយថា ចំនួនអ្នកស្លាប់ពិតប្រាកដអាចខ្ពស់ជាងនេះច្រើនដង។