ប្រធានសភាអ៊ីរ៉ង់ លោក Mohammad Bagher Ghalibaf កាលពីថ្ងៃអាទិត្យ (ទី២៩ ខែមីនា ឆ្នាំ២០២៦) បានព្រមានសហរដ្ឋអាមេរិកកុំឲ្យបើកការឈ្លានពានផ្លូវគោក ដោយគំរាមកំហែងថា នឹងធ្វើឲ្យកងទ័ពអាមេរិកជួបគ្រោះធំ ពោលគឺត្រូវប្រឈមនឹងការដុតកម្ទេច ហើយនឹងបង្កើនការវាយប្រហារលើសម្ព័ន្ធមិត្តអាមេរិក។ នេះបើយោងតាមប្រព័ន្ធផ្សព្វផ្សាយផ្លូវការរបស់អ៊ីរ៉ង់។

លោក Ghalibaf បាននិយាយថា កងកម្លាំងអ៊ីរ៉ង់កំពុង «រង់ចាំការមកដល់របស់កងទ័ពអាមេរិក នៅលើដីរបស់ខ្លួន ដើម្បីដុតកម្ទេចពួកគេ និងដាក់ទណ្ឌកម្មដៃគូក្នុងតំបន់របស់ពួកគេជារៀងរហូត»។ លោកបានបន្ថែមថា «ការបាញ់ប្រហាររបស់យើងនៅតែបន្តមាន។ មីស៊ីលរបស់យើងស្ថិតនៅទីតាំងត្រូវបាញ់។ ការតាំងចិត្ត និងជំនឿរបស់យើងបានមានកាន់តែខ្លាំងឡើងៗ»។

ជាមួយគ្នានេះ ប្រធានសភាអ៊ីរ៉ង់ក៏បានពិពណ៌នាផងដែរអំពីផែនការ ១៥ចំណុចរបស់សហរដ្ឋអាមេរិក ដែលប៉ាគីស្ថានបានបញ្ជូនទៅអ៊ីរ៉ង់កាលពីសប្តាហ៍មុនថា ជា «បំណងប្រាថ្នារបស់ពួកគេ» ហើយបាននិយាយថា រដ្ឋបាលរបស់លោកប្រធានាធិបតី Donald Trump កំពុងព្យាយាមធ្វើអ្វីៗតាមរយៈផែនការនេះ ជាអ្វីដែលខ្លួនមិនអាចសម្រេចបានដោយកម្លាំង។ លោក Ghalibaf បានសង្កត់ធ្ងន់ថា៖ «ដរាបណាជនជាតិអាមេរិកប្រឹងប្រែងឲ្យអ៊ីរ៉ង់ព្រមទទួលយកការចុះចាញ់ ការឆ្លើយតបរបស់យើង គឺច្បាស់លាស់ នោះគឺថា យើងនឹងមិនមានថ្ងៃទទួលយកភាពអាម៉ាស់ជាដាច់ខាត»។

មន្ទីរបញ្ចកោណបានរៀបចំផែនការសម្រាប់ការឈ្លានពានរយៈពេលមួយសប្តាហ៍ រួមទាំងការវាយឆ្មក់ដែលអាចកើតមាននៅលើកោះ Kharg ដែលជាមជ្ឈមណ្ឌលនាំចេញប្រេងសំខាន់របស់ទីក្រុងតេអេរ៉ង់ និងការវាយប្រហារលើទីតាំងឆ្នេរសមុទ្រក្បែរច្រកសមុទ្រហ័រមូស។

ទន្ទឹមនឹងនេះដែរ កងឆ្មាំបដិវត្តន៍បានគំរាមកំហែងកំណត់គោលដៅសាខានៃគ្រឹះស្ថានអប់រំអ៊ីស្រាអែល និងអាមេរិក នៅក្នុងតំបន់ ដោយចាត់ទុកទីតាំងទាំងនោះថា ជា «គោលដៅស្របច្បាប់» ប្រសិនបើសហរដ្ឋអាមេរិកមិនថ្កោលទោសការទម្លាក់គ្រាប់បែកលើសាកលវិទ្យាល័យអ៊ីរ៉ង់។ នេះជាលើកដំបូងហើយដែលអ៊ីរ៉ង់បានគំរាមវាយប្រហារសាកលវិទ្យាល័យអ៊ីស្រាអែល និងអាមេរិក៕