អាហ្វហ្គានីស្ថាន និងប៉ាគីស្ថាន បាននិយាយថា ភាគីទាំងពីរបានបើកការបាញ់ប្រហារដាក់គ្នាទៅវិញទៅមកដោយអាវុធធុនធ្ងន់ ប៉ុន្មានថ្ងៃប៉ុណ្ណោះបន្ទាប់ពីពួកគេបានប្រកាសផ្អាកប្រយុទ្ធបណ្តោះអាសន្ន។ ការផ្ទុះអាវុធជាថ្មីនេះធ្វើឱ្យភាពតានតឹងកាន់តែរីកធំឡើងក្នុងតំបន់ដែលកំពុងមានអស្ថិរភាពរួចទៅហើយ ខណៈទីក្រុងអ៊ីស្លាម៉ាបាដ កំពុងរៀបចំធ្វើជាម្ចាស់ផ្ទះនៃកិច្ចចរចាក្នុងជម្លោះរវាងអាមេរិក និងអ៊ីរ៉ង់។

ការប៉ះទង្គិចគ្នាតាមព្រំដែនបានកើតឡើងកាលពីថ្ងៃអាទិត្យ (២៩ មីនា) ពោលគឺជាថ្ងៃដែលប៉ាគីស្ថានធ្វើជាម្ចាស់ផ្ទះទទួលមហាអំណាចក្នុងតំបន់ ដើម្បីពិភាក្សាពីការកាត់បន្ថយភាពតានតឹងនៃសង្គ្រាមមជ្ឈិមបូព៌ា រួមជាមួយការប្រកាសថា ទីក្រុងអ៊ីស្លាម៉ាបាដអាចនឹងធ្វើជាម្ចាស់ផ្ទះកិច្ចចរចានៅប៉ុន្មានថ្ងៃខាងមុខ។

ក្រុមមន្ត្រីបាននិយាយថា ភាគីជម្លោះទាំងពីរបានប្រើប្រាស់កាំភ្លើងធំ និងអាវុធធុនធ្ងន់ដើម្បីវាយប្រហារទីតាំងនានាក្នុងខេត្ត Kunar របស់អាហ្វហ្គានីស្ថាន និងស្រុក Bajur តាមព្រំដែនក្នុងប្រទេសប៉ាគីស្ថាន។

លោក Hamdullah Fitrat មន្រ្តីតាលីបង់នៅទីក្រុងកាប៊ុល បាននិយាយថា ការបាញ់ប្រហាររបស់ប៉ាគីស្ថាន បានបង្កការស្លាប់និងរបួស។ មន្ត្រីសន្តិសុខប៉ាគីស្ថានបាននិយាយថា ប៉ាគីស្ថានគ្រាន់តែឆ្លើយតបទៅនឹងការបាញ់ផ្លោងយ៉ាងខ្លាំងក្លាពីសំណាក់អាហ្វហ្គានីស្ថានតែប៉ុណ្ណោះ ដោយបដិសេធថា ខ្លួនមិនបានកំណត់គោលដៅលើទីតាំងស៊ីវិលណាមួយឡើយ។

យ៉ាងណាមិញ កងទ័ពប៉ាគីស្ថានមិនបានឆ្លើយតបទៅនឹងសំណើសុំការអត្ថាធិប្បាយនោះទេ។ ការប្រយុទ្ធគ្នាដ៏អាក្រក់បំផុតរវាងប៉ាគីស្ថាន និងអាហ្វហ្គានីស្ថានក្នុងរយៈពេលជាច្រើនឆ្នាំមកនេះ បានផ្ទុះឡើងកាលពីខែមុន បណ្តាលឱ្យបាត់បង់ជីវិតមនុស្សយ៉ាងច្រើននៅភាគីទាំងសងខាង៕