ស្ថាបន័រាជរដ្ឋាភិបាលកម្ពុជា រួមជាមួយ ទីភ្នាក់ងារអង្គការសហប្រជាជាតិ អង្គការសង្គមស៊ីវិល និង​ដៃគូ​អភិវឌ្ឍន៍​ជាច្រើនផ្សេងទៀត នៅថ្ងៃទី៣០ ខែមីនានេះ បានរៀបចំកម្មវិធី​សម្ពោធ​របាយ​ការណ៍​អង្គការ​សហប្រជាជាតិ ស្តីពីការអភិវឌ្ឍទឹកពិភពលោកឆ្នាំ២០២៦ បន្ទាប់ពីបាន​ពិភាក្សា​គ្នា​យ៉ាង​លម្អិត​ក្នុងការពង្រឹងសមភាពយេនឌ័រ និងការធ្វើឱ្យមានបរិយាបន្នលើគោលនយោបាយ និង​ការ​អនុវត្ត​បញ្ហា​ទឹកស្អាត និងអនាម័យនៅកម្ពុជា។

នៅពេលនិយាយអំពីទឹកសមភាពយេនឌ័រ និងបរិយាបន្ននាំ​ទៅ​រក​ឱកាស​កាន់​តែ​ប្រសើរ​សម្រាប់​ទាំង​អស់​គ្នា។ សមភាពយេនឌ័រ គឺជាដំណើរការដ៏សំខាន់មួយសម្រាប់សិទ្ធិទទួលបាន និងការ​ប្រើប្រាស់ទឹ​កប្រកបដោយយុត្តិធម៌។ នេះគឺជា​សេចក្តី​សន្និដ្ឋាន​ដ៏​សំខាន់​មួយ​នៃ​របាយការណ៍​អភិវឌ្ឍន៍​ទឹកពិភពលោកឆ្នាំ២០២៦ របស់អង្គការសហប្រជាជាតិ (WWDR) ដែល​បោះពុម្ព​ដោយ​អង្គការ យូណេស្កូ ក្នុងនាម UN-Water ។

នៅក្រោយ​កម្មវិធីសម្ពោធរបាយការណ៍អង្គការសហប្រជាជាតិនេះ លោកស្រី ភាណ សោភ័ណ នាយិកា​អ​ង្គការអុកស្វាម បានឱ្យដឹងថា យោងតាម​ទិន្នន័យ​នៃ​គោល​ដៅ​អភិវឌ្ឍន៍​ប្រកប​ដោយ​ចីរភាព ស្តីពីការប្រើប្រាស់ទឹក ប្រជាជនកម្ពុជាជាង ៣៣% បានប្រើប្រាស់​សេវា​ទឹក​ដែល​មាន​ការ​គ្រប់​គ្រង​ដោយសុវត្ថិភាពក្នុងឆ្នាំ២០២៤។ ប្រទេសកម្ពុជា មានធនធានទឹកច្រើន រួមទាំង​ទន្លេ​មេគង្គ​ និងបឹងទន្លេសាប ប៉ុន្តែតំបន់ជាច្រើនប្រឈមមុខនឹងការខ្វះខាតទឹកធ្ងន់ធ្ងរក្នុងរដូវប្រាំង ដែ​ល​ប៉ះ​ពាល់ដល់ធនធានទឹក និងសុវត្ថិភាពរបស់សហគមន៍ក្នុងការប្រកបរបរការចិញ្ចឹមជីវិត។

នៅក្នុងកម្មវិធីនេះ លោកជំទាវ ងិន លីណា រដ្ឋលេខាធិការ និងជាប្រធានក្រុមការងារយេនឌ័រ នៃ​ក្រសួង​បរិស្ថាន បានមានប្រសាសន៍ថា សន្តិសុខទឹកសម្រាប់ទាំងអស់គ្នា គឺជាអាទិភា​ព​គោល​នយោបាយ​របស់រាជរដ្ឋាភិបាល ហើយវាបាននឹងកំពុងកៀងគរកិច្ចសហការពីវិស័យជាច្រើន និង​ភាពជាដៃគូសម្រាប់ការអនុវត្តអភិបាលកិច្ចទឹកដែលប្រកបដោយបរិយាបន្នអោយកាន់តែប្រសើរឡើង។ បរិយាកាស និងសកម្មភាពជាច្រើន ត្រូវបានគាំទ្រ​ដែល​ធ្វើអោ​យ​ប្រសើរ​ឡើង​នូវ​ភាព​ជា​អ្នកដឹ​ក​នាំរបស់ស្ត្រី និងការចូលរួមក្នុងការសម្រេចចិត្តការងារអភិបាលកិច្ចទឹក រួមទាំង​ការ​ពាក់​ព័ន្ធ​នឹង​លទ្ធភាពទទួលបានហិរញ្ញវត្ថុដែលមានតម្លៃសមរម្យសម្រាប់សហគ្រិនភាពរបស់ស្ត្រី។

ជុំវិញបញ្ហានេះ តំណាងអង្គការយូណេស្កូប្រចាំកម្ពុជា លោក Flavio Bonetti បាន​លើក​ឡើង​ពី​ការ​ប្តេជ្ញា​ចិត្តរបស់អង្គការយូណេស្កូ ក្នុងការពង្រឹងទំនាក់ទំនងរវាងអភិបាលកិច្ចទឹក សមភាព​យេន​ឌ័រ ​និងការអភិវឌ្ឍន៍ប្រកបដោយចីរភាព។ នៅក្នុងអាងទន្លេមេគង្គក្រោម អង្គការយូណេស្កូ​កំពុង​ធ្វើ​ការទាក់ទងនិងគម្លាតរវាង ទិន្នន័យនិង​សមត្ថភាព​ក្នុង​ការ​គ្រប់​គ្រង​ទឹក​ក្រោម​ដី​ឆ្លង​ព្រំដែន ព្រមទាំងការងារលើកកម្ពស់ការចូលរួមដោយ​ស្មើភាពរបស់​ស្ត្រី​តាម​រយៈ​ចំណុច​បង្គោល​យេន​ឌ័រ និងផែនការសកម្មភាពយេនឌ័រទឹកក្រោមដី៕ អត្ថបទ៖ ឈិត បូរ៉ាវី