នាយករដ្ឋមន្ត្រីអូស្ត្រាលី លោក Anthony Albanese នៅថ្ងៃចន្ទ (៣០ មីនា) នេះបាននិយាយថា លោកចង់បានភាពច្បាស់លាស់បន្ថែមទៀតពីលោកប្រធានាធិបតីអាមេរិក Donald Trump លើគោលបំណងនៃសង្គ្រាមនៅក្នុងប្រទេសអ៊ីរ៉ង់ ដែលបានអង្រួនទីផ្សារហិរញ្ញវត្ថុ និងតម្លៃថាមពលសកល។

នៅពេលត្រូវបានសាកសួរថា តើលោកមានទស្សនៈយ៉ាងណាចំពោះយុទ្ធសាស្រ្តសង្រ្គាមរបស់លោក Trump លោក Albanese បានឆ្លើយតបថា៖ «លោកចង់ឃើញច្បាស់លាស់បន្ថែមទៀតអំពីគោលបំណងនៃសង្គ្រាមនេះ ហើយលោកចង់ឃើញការថយចុះនៃភាពតានតឹង»។

គួរឱ្យដឹងថា អ៊ីស្រាអែល និងសហរដ្ឋអាមេរិក បានបើកការវាយប្រហាររួមគ្នាលើអ៊ីរ៉ង់ កាលពីថ្ងៃទី២៨ ខែកុម្ភៈ។ ជាការឆ្លើយតប អ៊ីរ៉ង់បានសងសឹកវិញតាមរយៈការវាយប្រហារដោយដ្រូន និងមីស៊ីល សំដៅទៅលើអ៊ីស្រាអែល ហ្ស៊កដានី អ៊ីរ៉ាក់ និងបណ្តាប្រទេសក្នុងតំបន់ឈូងសមុទ្រ ដែលមានមូលដ្ឋានយោធារបស់សហរដ្ឋអាមេរិក។ អ៊ីរ៉ង់ក៏បានបិទច្រកសមុទ្រហ័រមូសដ៏សំខាន់ផងដែរ។

ជាធម្មតា ផ្លូវទឹកយុទ្ធសាស្ត្រនេះ គឺជាច្រកដឹកជញ្ជូនប្រេងប្រហែល ២០ លានបារ៉ែលក្នុងមួយថ្ងៃ និងប្រហែល ២០% នៃតម្រូវការសកល។ អូស្ត្រាលីបានផ្តល់យន្តហោះចម្បាំងដើម្បីជួយការពារអេមីរ៉ាតអារ៉ាប់រួម បន្ទាប់ពីមានការស្នើសុំពីប្រទេសនេះ ប៉ុន្តែបានច្រានចោលការបញ្ជូននាវាចម្បាំងទៅជួយបើកច្រកសមុទ្រហ័រមូសឡើងវិញ៕