រដ្ឋមន្ត្រីក្រសួងហិរញ្ញវត្ថុនូវែលសេឡង់ បានលើកឡើងនៅថ្ងៃចន្ទ (៣០ មីនា) នេះថា អតិផរណាទំនងជានឹងកើនឡើង «រឹតតែខ្ពស់» នៅក្នុងឆ្នាំ២០២៦នេះ ហើយនឹងបន្តស្ថិតនៅក្រៅកម្រិតគោលដៅរបស់ធនាគារកណ្តាល ប្រសិនបើជម្លោះនៅមជ្ឈិមបូព៌ា នៅតែបន្តអូសបន្លាយពេលយូរថែមទៀត។

រដ្ឋមន្ត្រីក្រសួងហិរញ្ញវត្ថុ លោកស្រី Nicola Willis បាននិយាយថា តាមរយៈគំរូនៃការព្យាករចុងក្រោយរបស់ក្រសួងរតនាគារ អតិផរណានឹងហក់ឡើងដល់ចំណុចកំពូលខ្ពស់ជាងការរំពឹងទុកនាពេលកន្លងមក ដោយផ្អែកលើសេណារីយ៉ូ «ជម្លោះយូរអង្វែង ជាមួយនឹងការរំខានកាន់តែខ្លាំងដល់ខ្សែច្រវាក់ផ្គត់ផ្គង់»។

លោកស្រី Willis បានប្រាប់អ្នកយកព័ត៌មានថា៖ «ក្រសួងរតនាគារគិតថា អតិផរណានឹងឡើងខ្ពស់ខ្លាំងនៅឆ្នាំនេះ ហើយនឹងស្ថិតនៅក្រៅរង្វង់គោលដៅរបស់ក្រសួង»។ លោកស្រី Willis បានបដិសេធមិនបង្ហាញតួលេខជាក់លាក់នោះទេ ដោយសារលោកស្រីបញ្ជាក់ថា ក្រសួងរតនាគារមិនទាន់បានសម្រេចលើទិដ្ឋភាពចុងក្រោយ ឬសេណារីយ៉ូស្នូលណាមួយនៅឡើយ។

ទិន្នន័យដែលបានចេញផ្សាយកាលពីខែមករាកន្លងទៅ បានបង្ហាញថា អតិផរណានូវែលសេឡង់ នៅត្រីមាសទីបួនមានកម្រិត ៣,១% ដែលបានឡើងលើសកម្រិតគោលដៅរបស់ធនាគារកណ្តាលដែលបានដាក់គឺចន្លោះពី ១% ទៅ ៣%។ ជាមួយនឹងការកើនឡើងនៃតម្លៃថាមពលនៅទូទាំងសកលលោកដោយសារជម្លោះនៅអ៊ីរ៉ង់ ទីផ្សារហិរញ្ញវត្ថុកំពុងរំពឹងទុកកាន់តែខ្លាំងឡើងនូវការរឹតបន្តឹងគោលនយោបាយរូបិយវត្ថុក្នុងពេលឆាប់ៗខាងមុខ៕