ប្រតិបត្តិការយោធារវាងសហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់អាចនាំឲ្យមានការប្រណាំងប្រជែងអាវុធនុយក្លេអ៊ែរមួយជុំទៀត។ នេះបើយោងតាមរបាយការណ៍របស់សារព័ត៌មាន Bloomberg។

យោងតាមប្រព័ន្ធផ្សព្វផ្សាយនេះ រដ្ឋាភិបាលនានា «ចាប់ពីអាត្លង់ទិកខាងជើងដល់ប៉ាស៊ីហ្វិកខាងលិច» កំពុងជជែកវែកញែកថាតើពួកគេក៏គួរស្វែងរកអាវុធនុយក្លេអ៊ែរដែរឬទេ។ លើសពីនេះ ប្រទេសដែលពេញចិត្តជាយូរមកហើយក្នុងការស្ថិតនៅក្រោមឆ័ត្រនុយក្លេអ៊ែររបស់សហរដ្ឋអាមេរិក ដូចជាអាល្លឺម៉ង់ និងប៉ូឡូញបាន «ស្វាគមន៍ចំពោះការស្នើសុំរបស់បារាំងអំពីការពង្រីកការការពារជាយុទ្ធសាស្ត្ររបស់ប្រទេសនេះ នៅទូទាំងទ្វីបនេះ»។

កាសែត Bloomberg បន្ថែមថា៖«សហរដ្ឋអាមេរិក ជាប្រទេសតែមួយគត់ដែលប្រើប្រាស់អាវុធនុយក្លេអ៊ែរប្រឆាំងនឹងប្រជាជនស៊ីវិល កំពុងវាយតម្លៃការវិលត្រឡប់ទៅរកការធ្វើតេស្តគ្រាប់បែកបរមាណូ»។

លោក Rafael Grossi អគ្គនាយកទីភ្នាក់ងារថាមពលបរមាណូអន្តរជាតិ (IAEA) បានថ្លែងថា៖«លទ្ធភាពនៃការទទួលបានអាវុធមហាប្រល័យបែបនេះ ត្រូវបានពិភាក្សាដោយបើកចំហ សូម្បីតែនៅក្នុងប្រទេសមួយចំនួនដែលបានសន្យាថា នឹងមិនមានវាក៏ដោយ»។ លោកបានបន្ថែមថា៖«ប៉ុន្តែអាវុធនុយក្លេអ៊ែរកាន់តែច្រើន នៅក្នុងប្រទេសកាន់តែច្រើន នឹងមិនធ្វើឲ្យពិភពលោកមានសុវត្ថិភាពជាងមុនទេ។ វាមានសារៈសំខាន់ជាងពេលណាៗទាំងអស់ក្នុងការថែរក្សាបទដ្ឋានមិនរីកសាយភាយអាវុធនុយក្លេអ៊ែរ ដែលបានបម្រើពិភពលោកយ៉ាងល្អអស់រយៈពេលកន្លះសតវត្សរ៍កន្លងមក»។

សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់ នៅថ្ងៃទី២៨ ខែកុម្ភៈ ដោយវាយប្រហារទីក្រុងធំៗ រួមទាំងទីក្រុងតេអេរ៉ង់ផងដែរ។ សេតវិមានបានបង្ហាញភាពត្រឹមត្រូវនូវការវាយប្រហារនេះ ដោយលើកឡើងពីការគំរាមកំហែងដោយមីស៊ីល និងនុយក្លេអ៊ែរពីអ៊ីរ៉ង់៕