ក្រុមអ្នកតវ៉ាដែលគាំទ្រអតីតនាយករដ្ឋមន្ត្រីនេប៉ាល់ លោក K.P. Sharma Oli កាលពីថ្ងៃអាទិត្យ ទី២៩ ខែមីនា បានប៉ះទង្គិចជាមួយនគរបាលនេប៉ាល់នៅតាមដងផ្លូវនៅទីក្រុង Kathmandu ជាលើកទីពីរនៅថ្ងៃចុងសប្តាហ៍កន្លងទៅនេះ។ អ្នកគាំទ្រមួយចំនួនត្រូវបានគេមើលឃើញមានរបួស ខណៈនគរបាលបានវាយក្រុមអ្នកតវ៉ាដោយដំបង និងចាប់ឃុំខ្លួនអ្នកផ្សេងទៀត។

មនុស្សម្នាក់បានរងរបួស និង៩នាក់ផ្សេងទៀតត្រូវបានចាប់ខ្លួន បន្ទាប់ពីការតវ៉ាគាំទ្រអតីតនាយករដ្ឋមន្ត្រីនេប៉ាល់ លោក K.P. Sharma Oli ដែលការតវ៉ាបានប្រែក្លាយទៅជាអំពើហិង្សានៅទីក្រុង Kathmandu ។ លោក Oli ត្រូវបានចាប់ខ្លួនកាលពីថ្ងៃសៅរ៍ ខណៈនគរបាលកំពុងស៊ើបអង្កេតថាតើលោកមានការធ្វេសប្រហែសក្នុងការបរាជ័យមិនអាចទប់ស្កាត់ការស្លាប់មនុស្សរាប់សិបនាក់នៅក្នុងការបង្ក្រាបលើការតវ៉ាប្រឆាំងអំពើពុករលួយដឹកនាំដោយក្រុម Gen Z កាលពីខែកញ្ញាឆ្នាំមុនត់ នេះបើយោងតាមមន្ត្រី។ ការចាប់ខ្លួនលោក មេធាវីបាននិយាយថាជារឿងខុសច្បាប់ បង្កឱ្យមានការតវ៉ាដោយអ្នកគាំទ្រដែលបានប៉ះទង្គិចជាមួយនគរបាល បន្ទាប់ពីការស្បថចូលកាន់តំណែងរបស់លោក Balendra Shah ជាតារាចម្រៀងរ៉េប ក្លាយជាអ្នកនយោបាយកាលពីថ្ងៃសុក្រ សប្តាហ៍មុននេះ។

មនុស្សចំនួន៧៦នាក់ត្រូវបានសម្លាប់កាលពីខែកញ្ញាឆ្នាំមុន ក្នុងអំឡុងពេលនៃការបង្ក្រាបរបស់នគរបាល និងការលួចដុត និងភាពវឹកវរដោយហិង្សាក្នុងអំឡុងពេលតវ៉ា ដែលនាំឱ្យលោក Oli លាលែងពីតំណែង។ បន្ទាប់ពីការចាប់ខ្លួនលោកកាលពីថ្ងៃសៅរ៍ អ្នកគាំទ្របានធ្វើបាតុកម្មតវ៉ា និងបានប៉ះទង្គិចជាមួយនគរបាលដែលបានព្យាយាមបញ្ឈប់ពួកគេមិនឲ្យដុតសំបកកង់រថយន្តនៅជិតការិយាល័យនាយករដ្ឋមន្ត្រី។ សាក្សីនិយាយថា នគរបាលបានបាញ់គ្រាប់បែកផ្សែងបង្ហៀរទឹកភ្នែក និងប្រើដំបងដើម្បីបំបែកការតវ៉ា។